Azərbaycan İnterpol vasitəsilə öz diplomatını həbs etmək istəyir

İnterpolun Azərbaycan Milli Bürosu ölkənin Avropa Şurasındakı nümayəndələyinin keçmiş rəhbəri, bu yaxınlara kimi Aİ yanında İslam Konfransında nümayəndə Arif Məmmədovun saxlanılaraq məsuliyyət cəlb etməyi qərara alıb.  Bu barədə Baş Prokurorluğun mətbuat xidmətinin məlumatında deyilir.

“İnterpolun xəttilə müvafiq əməliyyat-istintaq tədbirləri həyata keçirilir”, - məlumatda deyilir. Lakin A.Məmmədovun barəsində axtarışın elan edilib-edilmədiyi hələlik  məlum deyil.

Səbəblərə gəlincə, Baş Prokurorluğun 12 avqust tarixli məlumatında bildirilir ki, A. Məmmədov Azərbaycanın Avropa Şurası yanında Daimi Nümayəndəliyinin rəhbəri vəzifəsində işləyərkən (2007-2012-ci illər) qulluq mövqeyindən və vəzifə səlahiyyətlərindən sui-istifadə etməklə büdcə vəsaitlərini təyinatdan kənar istifadə etmə, dövlət əmlakını külli miqdarda mənimsəmə və ya israf etmə yolu ilə talama, rəsmi sənədlərə bilə-bilə yalan məlumat daxil etməklə vəzifə saxtakarlığı cinayətlərini törətməsi və digər qanun pozuntularına yol verməsi halları aşkar edilib.

Bununla əlaqədar prokururluq Cinayət Məcəlləsinin 179.3.2 (mənimsəmə və ya israf etmə külli miqdarda törədildikdə) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə cinayət işi qaldırıb.

Diplomatın fəaliyyətinin yoxlanmasına bu ilin mayında Bakıda yaşayış binasında baş vermiş yanğın zamanı 16 nəfərin ölümünə götə dövlət məmurlarını Facebook səhifəsində tənqid etməsi səbəb olub. Bu, hakimiyyətin xoşuna gəlməyib və az qala A.Məmmədov dövlət çevrilişi hazırlayan xalq və hökumət düşməni elan edilsin. Bundan sonra diplomata qarşı təqiblər başlayıb və hakimiyyət birdən-birə onun keçmiş işini yoxlamağa başlayıb.

Yoxlama zamanı məlum ki, A.Məmmədov şəxsi istifadə üçün avtomobil almaq məqsədi ilə diplomatik nümayəndəliklərə avtomobillərin alınması üçün tətbiq edilən 27.5%-lik güzəştdən qulluq səlahiyyətlərindən sui-istifadə edərək 11 fevral 2011-ci il tarixdə daimi nümayəndəliyin bank hesabına 43.0 min avro pul köçürüb və sonradan həmin vəsaiti BMW Strasburq şirkətinə ödəyib. Əldə etdiyi “BMW X5” markalı avtomobili rəsmi sənədlərdə saxtakarlıq edərək daimi nümayəndəlik üçün aldığını göstərməklə vergi qanunvericiliyinin tələblərini kobud surətdə pozaraq 8.0 min avro məbləğində vəsaiti vergidən qəsdən yayındırıb. Qısa müddətdən sonra o, həmin avtomobili kənar şəxsə satıb.

2010-cu ildə Stasburqda təşkil edilən “Novruz“ şənliyi “Türksoy” Beynəlxalq Türk Mədəniyyət Təşkilatının maliyyə vəsaiti hesabına keçirildiyi halda A.Məmmədov həmin tədbirin guya nümayəndəlik tərəfindən keçirilməsi adı ilə nümayəndəliyin xəzinəsindən 11.600 avro məbləğində maliyyə vəsaitini silməklə mənimsəyib. 

Prokurorluq bildirir ki, 2007 və  2012-ci illərdə Azərbaycan Milli Məclisinin nümayəndə heyətinin Strasburqa səfəri zamanı qəbul, ziyafət və digər məqsədlər üçün ümumilikdə 19.900 avro məbləğində xərclər Milli Məclisin İşlər İdarəsi tərəfindən müvafiq qaydada ödənildiyi halda A.Məmmədov həmin pul vəsaitini təşkil edilmiş tədbirlərin guya daimi nümayəndəlik tərəfindən həyata keçirilməsi barədə saxta sənədlər tərtib etməklə mənimsəyib.

2007-ci ildə ona hesablanmış 18.500 avro məbləğində əmək haqqını əvvəlcədən alıb və yenidən həmin ilin oktyabr ayı üzrə 3.700 avro məbləğində vəsaiti təkrarən əmək haqqı şəklində alaraq mənimsəyib.

Yaşadığı evdə işlətdiyi elektrik enerjisinə görə ödənişləri mövcud qanunvericiliyin tələblərinə müvafiq olaraq öz vəsaiti hesabına həyata keçirməli olduğu halda büdcə vəsaitlərini təyinatdan kənar istifadə edərək 2007-2012-ci illərdə həmin məqsədlə 6.500 avronu dövlət vəsaiti hesabına ödəyib.

A.Məmmədov həmçinin vəzifə səlahiyyətlərindən sui-istifadə edərək nümayəndəliyin balansında olan və dəyəri 25.300 avro təşkil edən 2 ədəd avtomobili Dövlət Əmlak Komitəsinin razılığını almadan qanunsuz olaraq 7.100 avroya rəsmiləşdirib satmaqla dövlətin qanunla qorunan mənafelərinə mühüm zərər vurub.

Qeyd edək ki, may qalmaqalından sonra A.Məmmədov Azərbaycan XİN sistemindən xaric edilib və o, Azərbaycana qayıtmaq istəmədiyini bildirib. Həmçinin o, bəzi siyasi bəyanatlar verərək Azərbaycan hakimiyyətinin siyasətini pisləyib. -16/02D-