QKDK iki maliyyə strukturunun emissiyasını baş tutmamış elan edib

Qiymətli Kağızlar üzrə Dövlət Komitəsi (QKDK) “EvroBank” və “Buta Sığorta”nın səhmlərinin buraxılışını baş tutmamış hesab edib.

Bu maliyyə strukturlarının qiymətli kağız buraxılışı emissiya prospektində göstərilən həcmdə olmaması ilə bağlı baş tutmamış sayılıb. Qeyd edək ki, bu yaxınlarda qəbul edilən “Qiymətli kağızlar bazarı haqqında” qanuna əsasən, emissiya prospektində göstərilən həcmdə və ya  memorandumda göstərilən qədər yerləşdirilməyəndə qiymətli kağız buraxılışı baş tutmamış hesab edilə bilər. Buna qədər QK-ın 50%-i yerləşdirmək kifayət edirdi.

“EvroBank” ASC bu ilin yanvarında nizamnamə kapitalını 50 mln manata çatdırmaq üçün 39 mln manat həcmində səhm emissiyası elan etdi. Yerləşdirmə 6 aya başa çatmalı idi. AMB iyulun 10-da “EvroBank” ASC-nin lisenziyasının ləğv edilməsi barədə qərar qəbul etdi.

2014-cü ilin martında “Buta Sığorta”nın 4 mln manat məbləğində səhm emissiyası həyata keçirildi. Yerləşdirməyə 1 il vaxt ayrıldı. Amma QKDK yalnız indi “Buta Sigorta”nın uğursuz yerləşdirməsi barədə məlumat verir. BU sığorta şirkətinin səhmləri “NAB Group of Companies” şirkətinə daxil 4 kommersiya təşkilatına, eləcə də “Bank of Baku” (19%) ASC-yə məxsusdur. NAB “Bank of Baku”da 40% səhm sahibidir. -08D-