Azərbaycan-İran sərhədi qismən açılıb

İranın Azərbaycanla sərhəd-keçid məntəqələri qismən açılıb. Bu barədə Turan-a Naxçıvanda sərhəd-keçid məntəqələrində İrana səfər edən turistlərdən bəlli olub. 

Belə ki, bu gün səhərdən İrana piyada keçən turistlər buraxılıb.  Amma avtomobillərin hərəkəti hələ də bərpa olunmayıb. Bu gün Naxçıvandan İran ərazisi vasitəsi ilə Bakıya gələn avtobuslara yenə bilet satılmayıb. 

Bununla yanaşı sərhəddin açılıb-açılmaması barədə hər hansı rəsmi məlumat verilmir. Nə Azərbaycan Dövlət Sərhəd Xidməti, nə də Gömrük Komitəsi rəsmi məlumat yaymayıblar. Turan-ın telefon zənglərinə isə nə Bakıda, nə də Naxçıvanda cavab verən olmayıb. 

İranın Bakıdakı səfirliyindən də məsələyə aydınlıq gətirmək mümkün olmayıb. Bir neçə dəfə telefon etməyimizə  baxmayaraq, biri digərinə zəng etməyi məsləhət görüb. Sonda səfirliyin mətbuat xidmətinin rəhbərinin ölkədə olmadığı bildirilib və digər məsul şəxslərin isə iclasda olduğu deyilib. “Bir neçə saatdan sonra zəng edin”, -  əməkdaş bildirib.  

Noyabrın 5-də Naxçıvanın Şərur rayonunun Dəmirçi kəndi yaxınlığında Araz çayında sahilbərkitmə işlərini aparan traktora İran  ərazisindən 2 nəfər hərbi geyimli şəxs atəş açıb. Sürücü atəşdən yayına bilib, amma traktora bir neçə güllə dəyib. 

Noyabrın 6-da Azərbaycan həmin ərazidəki  Poldəşt-Şahtaxtı sərhəd-keçid məntəqəsini İran tərəfini xəbərdar edərək müvəqqəti olaraq bağlayıb. Noyabrın 7-də isə İran Biləsuvar və Culfa sərhəd-keçid məntəqələrini bağlayıb. 

Bu,  Azərbaycanla Naxçıvan arasında quru yolunun bağlanması deməkdir. Belə ki, Azərbaycan-İran razılaşmasına görə, Naxçıvan Muxtar Respublikasının Ermənistanın təcavüzü nəticəsində blokadaya alınmasına rəğmən İran öz ərazisi vasitəsi ilə Naxçıvana avtomobillərinin gedib-gəlməsinə icazə verib. 

Müşahidəçilər İran və Azərbaycan arasında sərhəd mübahisəsinin əslində heç də traktor məsələsi olmadığını düşünürlər. Burada əsas problem  İranın  Azərbaycan ərazisindən narkotik maddə tranziti maraqlarının qarşısının alınmasıdır. Belə ki, Azərbaycana gətirilən narkotiklərin əksər hissəsi İran-Azərbaycan sərhəddi vasitəsi ilə daşınır. Həmçinin Azərbaycan rəsmiləri İranın Azərbaycanın Ermənistanın işğalında olan Dağlıq Qarabağ bölgəsi vasitəsi ilə narkotik maddə daşıdığını dəfələrlə bildirib.

Bəzi şərhədçilər isə Rusiyada azərbaycanlı miqrantlara qarşı başlanan ayrı-seçkilikdən sonra İrandan da Azərbaycana qarşı təzyiqlərin başlanacağını istisna etmirlər.-03B-