Azərbaycan Müdafiə Nazirliyi: Elə bir zərbə endirəcəyik ki, ermənilər özlərinə gələ bilməyəcəklər

“Düşmən tərəfi növbəti dəfə hər hansı bir hərbi əməliyyata əl atarsa Azərbaycan Silahlı Qüvvələrinin işğalçılara dərhal vuracağı zərbə hədsiz dərəcədə təsirli, məhvedici olacaq, külli miqdarda itkilər və dağıntılarla nəticələnəcək, uzun müddət onların yaddaşlarından silinməyəcəkdir”.

Bu sərt xəbərdarlıq Azərbaycan Müdafiə Nazirliyinin “Ermənistan tərəfin məsuliyyətsiz hədə-qorxularına” cavab bəyanatında yer alır.

“Azərbaycan Müdafiə Nazirliyi rəsmi olaraq bildirir ki, düşmən tərəfi işğal edilmiş ərazilərdən qoşunlarının qeyd-şərtsiz və dərhal çıxarılmasının vacibliyini anlamalı, erməni gənclərini ədalətsiz müharibədən çəkindirərək əbəs yerə qırdırmamalıdır.

Azərbaycan Respublikasının Silahlı Qüvvələri düşmənin istənilən təxribatının qarşısını almağa qadirdir və hazırdır”, deyə bəyanatda bildirilir.

Qeyd edək ki, noyabrın 12-də Ağdam rayonunda Ermənistana məxsus Mİ-24 döyüş helikopterinin məhv edilməsindən sonra Ermənistan rəhbərliyi Azərbaycanı “cəzalandırmaqla” hədələyib. -02D-