Azərbaycan Müdafiə Nazirliyindən Ermənistanla sərhəddə eskalasiya anonsu

Martın 31-də Azərbaycan Müdafiə Nazirliyi Ermənistana xəbərdarlıq xarakterli bəyanat yayıb.

“Son zamanlar Ermənistan-Azərbaycan şərti sərhədinin müxtəlif istiqamətlərində Ermənistan silahlı qüvvələrinin canlı qüvvəsi, zirehli texnikası, artilleriya qurğuları, habelə digər ağır atəş vasitələrinin cəmləşdirilməsi və qoşunların intensiv hərəkəti müşahidə olunur. 

Son vaxtlar Ermənistanda Azərbaycanı müharibə ilə hədələyən revanşist qüvvələrin daha da fəallaşması, ölkəmizə qarşı aqressiv ritorikanın yüksək həddə çatması və təxribat cəhdlərinə hazırlıq məqsədilə informasiya məkanında vəziyyətin gərginləşməsinə xidmət edən təhrikçi məlumatların sayının artması özünü büruzə verir.

Xəbərdarlıq edirik ki, Ermənistan silahlı qüvvələri tərəfindən Azərbaycana qarşı hər hansı hərbi təxribat cəhdi olarsa, onun qarşısı Azərbaycan Ordusu tərəfindən qətiyyətlə alınacaqdır.     

Bir daha bəyan edirik ki, vəziyyətin gərginləşməsinə və baş verə biləcək hər hansı təxribata görə bütün məsuliyyət tamamilə Ermənistan və onun havadarlarının üzərinə düşəcəkdir”.

Qeyd edək ki, bir gün əvvəl internetdə Ermənistan Silahlı Qüvvələrinin çoxlu sayda hərbi texnikası və canlı qüvvəsinin Naxçıvanla sərhədə yaxın olan Yerasx qəsəbəsi ərazisində hərəkətini əks etdirən videogörüntülər yayılıb.