Azərbaycan OPEC baş katibi Barkindonun vəfatı ilə əlaqədar başsağlığı verib

Bakı/06.07.22/Turan: Azərbaycanın energetika naziri Pərviz Şahbazov iyulun 5-də axşam OPEC-in baş katibi, 63 yaşlı Məhəmməd Barkindonun vəfatı ilə bağlı başsağlığı verib.

"Ən mürəkkəb dövrdə neft bazarının tənzimlənməsində əvəzsiz xidmətləri olan əziz dostum M.S.Barkindonun vəfatı məni çox kədərləndirdi... OPEC-in intibahı onun baş katibliyi illərinə təsadüf edib", deyə Şahbazov öz Twitter səhifəsində yazıb.

Barkindonun vəfatı haqqında Nigeriyanın təşkilatdakı nümayəndəsi Mele Kyari öz tvitter hesabında məlumat vermişdi.

"Hörmətli doktor Məhəmməd Sanusi Barkindonu itirdik. O, 5 iyul 2022 tarixində saat 23:00 radələrində vəfat edib. Şübhəsiz, bu, onun yaxın qohumları, NNPC, ölkəmiz Nigeriya, OPEC və dünya enerji ictimaiyyəti üçün böyük itkidir. Dəfn haqqında məlumat yaxın günlərdə açıqlanacaq", deyə o yazıb.

Kyari həmçinin bildirib ki, Barkindo Nigeriya prezidenti ilə görüşdükdən və Abucda energetika sammitində çıxış etdikdən bir neçə saat sonra vəfat edib.

Onun son nitqində son illər COVİD-19 pandemiyası ilə əlaqədar kifayət qədər investisiya olmadığına görə dünyada neft-qaz sahəsinin "mühasirədə" olduğundan danışılırdı. OPEC baş katibi İran və Venesuelaya - dünyanın iki ən böyük neft hasilatçısına neft ticarəti həyata keçirmək icazəsi verməyə çağırırdı, bunun "qara qızıl" çatışmazlığından yayınmağa imkan verəcəyini iddia edirdi. Hazırda bu ölkələrə ABŞ-ın sanksiyaları tətbiq edilir.

Barkindonun neft sahəsindəki karyerası 1980-ci illərin əvvəllərində Nigeriyada başlayıb. O, NNPC-də müxtəlif vəzifələr tutub və OPEC İqtisadi Komissiyasının Şurasında Nigeriyanı təmsil edib.

O, 2006-cı ildə OPEC-in baş katibi səlahiyyətlərini icra edib. Sonradan 2016-cı ildə bu vəzifəyə qayıdıb və neft bazarının təlatümlü olduğu dövrdə təşkilata rəhbərlik edib, eyni zamanda təşkilatın fəaliyyətini OPEC-ə daxil olmayan neft istehsalçıları ilə daha sıx əməkdaşlığa istiqamətləndirib. -0-