Azərbaycan prezidenti Macarıstana gedir

Cümə axşamı prezident İlham Əliyev xaricə gedib.

Bundan öncə xəbər verilmişdi ki, bu həftə dövlət başçısının Macarıstana rəsmi səfəri olacaq. Lakin hələlik bununla bağlı heç bir rəsmi məlumat yoxdur.

Paytaxtın mərkəzində nəqliyyatın iflic vəziyyətinə baxmayaraq, yol polisinin olmaması da bunu dolayısı ilə təsdiqləyir.

Turan qeyd edir ki, prezidentin rəsmi qəbulları barədə son məlumat noyabrın 5-də olub. Məlumatda dövlət başçısının Böyük Britaniyanın Avropa məsələləri üzrə naziri Devid Lidinqilə görüşündən danışılır.

Bundan əvvəl noyabrın 3-də prezident İ.Əliyev Macarıstanın xarici işlər və ticarət naziri Peter Siyartonun rəhbərlik etdiyi nümayəndə heyətini qəbul edib. Görüş zamanı turizm, gənclər, informasiya-kommunikasiya texnologiyaları, əczaçılıq, hava nəqliyyatı, həmçinin Aİ “Şərq Tərəfdaşlığı” siyasəti çərçivəsində məsələlər müzakirə edilib.

P. Siyarto bildirib ki, prezident İ.Əliyevin Budapeşt səfəri zamanı Azərbaycanla Macarıstan arasında strateji əməkdaşlıq haqqında saziş imzalanacaq.  Həmçinin beş sazişin imzalanması gözlənilir. Bunların arasında əsasən mülki aviasiya haqqında  saziş var ki, bu da 2015-ci ilin martında açılacaq birbaşa hava əlaqəsi üçün hüquqi bazanı yaradır.

Macarıstanın rəsmi saytları və KİV İ.Əliyevin səfərinə dair məlumat vermirlər. Bu o deməkdir ki, İ.Əliyev Budapeştdən öncə başqa yerə gedib,  Turan belə hesab edir.

Budapeşt görüşlərinə gəlincə, istisna deyil ki, əsas məsələlərdən biri Nabucco West (Türkiyə, Bolqarıstan, Macarıstan, Çexiya, Almaniya) qaz kəmərinin inşası olacaq. Bu layihə 2013-cü ilin iyununda Transadriatik qaz kəməri (Türkiyə-Yunanıstan-İtaliya) marşrutu seçildikdən sonra dondurulub. O zaman ekspertlər bunu müvəqqəti qərar adlandırırdılar.

RusEnergy konsaltinq agentliyinin tərəfdaşı və analitik Mixail Krutixin qeyd edib ki, əgər Türkiyədən Bolqarıstana aralıq bənd tikilərsə Nabukko-nun hər hansı formada reallaşması mümkündür. Oradan artıq mövcud bəndlər vasitəsilə qaz qonşu ölkələrə - Rumıniya, sonra isə Macarıstan vasitəsilə  Avstriyaya daxil ola bilər. Əgər baş tutarsa, Nabukko planlaşdırıldığı kimi fəaliyyət göstərə bilər. Hər iki qaz kəməri ilə Azərbaycan və Türkmənistandan qaz nəqli nəzərdə tutulur.

Rusiya Nabucco West qaz kəmərinin inşasında maraqlı deyil. Lakin hazırda məsələ o qədər də kəskin deyil. Belə ki, ötən gün Macarıstan parlamenti rəqabətdə olan “Cənub axını” layihəsini təsdiqləyib. Bu layihə Rusiya qazının Avropaya nəqlini nəzərdə tutur.

Turan Azərbaycan-Macarıstan ikitərəfli münasibətlərinə toxunaraq qeyd edir ki, 2013-cü ildə əmtəə dövriyyəsi $33,1 mln. təşkil edib. Bu 2012-ci illə müqayisədə 40% artım deməkdir. Həm 2012-ci, həm də 2013-cü ildə əməliyyatların 99%-i Macarıstan ixracının payına düşüb.

Bu ilin birinci yarısında Macarıstandan Azərbaycana $13,2 mln. həcmində mal idxal edilib. İxrac isə $354,5 min təşkil edib (əsasən reaktiv mühərrik üçün kerosin və yod).

Macarıstandan Azərbaycana damazlıq inək, meyvə konservi, dərman preparatları, yuyucu vasitələr, elektrik və elektron cihazlar, şəxsi gigiyena əşyaları və s. göndərilir.–0-