Azərbaycan Prezidenti və Baş naziri Zelenskini Ukraynanın Müstəqillik Günü münasibətilə təbrik ediblər

Bakı/24.08.23/Turan: Azərbaycan Prezidenti İlham Əliyev Ukrayna Prezidenti Vladimir Zelenskiyə avqustun 24-də bu ölkənin milli bayramı - Müstəqillik Günü münasibətilə təbrik məktubu göndərib.

"Azərbaycan ilə Ukrayna arasında münasibətlərin hazırkı yüksək səviyyəsi xalqlarımızın tarixən təşəkkül tapmış sıx dostluq və qarşılıqlı hörmət ənənələrindən irəli gəlir. Bu iradədən qaynaqlanan və möhkəm təməllər üzərində qurulan dövlətlərarası əlaqələrimizin birgə səylərimizlə dinamik inkişaf edərək yeni mərhələyə yüksəlməsi məmnunluq doğurur. Azərbaycan-Ukrayna əlaqələrinin keçən ilin yanvarında Ukraynaya səfərim zamanı imzaladığımız Birgə Bəyannamədə öz əksini tapmış məram və məqsədlərə uyğun olaraq bundan sonra da inkişaf edəcəyinə inanıram", - Prezident İlham Əliyevin müraciətində deyilir.

"Azərbaycan BMT Nizamnaməsinə, beynəlxalq hüququn norma və prinsiplərinə daim sadiq qalaraq bütün dövlətlərin, o cümlədən Ukraynanın suverenliyinə və ərazi bütövlüyünə hörmət edir. Biz Ukrayna xalqına humanitar yardım məsələlərini daim diqqətdə saxlayır, bundan sonra da lazımi yardım göstərməyə hazır olduğumuzu bildiririk.

Əminəm ki, xalqlarımızın mənafelərinə uyğun olaraq Azərbaycan ilə Ukrayna arasında dostluq münasibətlərinin genişlənməsi, qarşılıqlı faydalı əməkdaşlığımızın möhkəmlənməsi yolunda birgə səylərimizi bundan sonra da ardıcıl şəkildə davam etdirəcəyik", - deyə təbrikdə qeyd edilir.

Öz növbəsində Azərbaycanın Baş naziri Əli Əsədov Ukrayna hökumətinin başçısı Denis Şmıxala təbrik məktubu göndərib. Orada qeyd olunur ki, Azərbaycan ilə Ukrayna arasında ənənəvi dostluq münasibətləri və səmərəli əməkdaşlıq bundan sonra da iki ölkənin xalqlarının və dövlətlərinin maraqlarına uyğun olaraq uğurla inkişaf edəcək və genişlənəcək. 03B