Azərbaycan Qarabağ nizamlanmasında Fransanın hər hansı rolunu görmür

Bakı /02.06.21/Turan: Bakı Qarabağda atəşkəsdə Parisin heç bir rolunu görmür. Bu proses Azərbaycan, Ermənistan və Rusiya liderlərinin üçtərəfli bəyanatı əsasında təmin edilir. Azərbaycan ərazisində müvəqqəti yerləşən Rusiya sülhməramlı qüvvələri atəşkəsi təmin etmək missiyanı yerinə yetiririlər.  Bu barədə Fransa prezidenti Emanuel Makronun iyunun 1-də Parisdə söylədiyi fikirlərlə bağlı Azərbaycan Xarici İşlər Nazirliyi mətbuat xidmətinin rəhbəri Leyla Abdullayevanın şərhində deyilir.

Azərbaycanda erməni hərbi əsir yoxdur, o ki, qaldı üçtərəfli bəyanat imzalandıqdan sonra Azərbaycana göndərilən və burada terror aktı törədən diversant qrupun üzvlərinə, habelə Kəlbəcər rayonu istiqamətində ərazimizə daxil olaraq yolların minalanmasına yönələn təxribatçı fəaliyyət cəhdi göstərən kəşfiyyat-diversiya qrupunun üzvlərinə, onlar hərbi əsir deyil.

Tərəflər arasında birbaşa dialoqa gəlincə, bu, artıq Azərbaycan, Ermənistan və Rusiya baş nazirlərinin müavinləri səviyyəsində gedir. Fransa burada heç bir rol oynamır.

“Sirr deyil ki, Fransanın Ermənistana xüsusi rəğbəti var, amma Minsk Qrupunun həmsədri kimi bu ölkə rəsmi neytrallığını saxlamalıdır. Ümid edirik ki, həmsədrlik mandatına uyğun olaraq Fransa tərəfindən neytral və qərəzsiz mövqe sərgilənəcək”, - şərhdə deyilir.-02D-