Azərbaycan Səhiyyə Nazirliyinin Gürcüstanda koronavirusa yoluxmuş xəstə haqqında məlumatı

Bakı/27.02.20/Turan: Gürcüstan vətəndaşı Azərbaycana daxil olarkən onda koronavirus simptomları aşkar edilməyib. Bu barədə Azərbaycan Səhiyyə Nazirliyinin Gürcüstanda ölkəyə Azərbaycandan tranzitlə gələn vətəndaşda koronavirus aşkar edilməsi ilə bağlı məlumatında deyilir.

Araşdırma zamanı bu şəxsin Astara gömrük nəzarət məntəqəsindən keçməsinin videokadrları tədqiq edilib. Həmin vaxt onun qızdırması normada olub.

Ola bilər ki, xəstəlik simptomları onun Gürcüstan sərhədinə getdiyi sonrakı 10-12 saat ərzində meydana çıxıb. Məlum olduğu kimi, virusun inkubasiya dövrü 14 gün təşkil edir.

Bununla əlaqədar, Gürcüstan vətəndaşı ilə əlaqədə olmuş şəxslər, o cümlədən gömrükçülər, sərhədçilər və tibb işçiləri tibbi nəzarətə götürülüb.

Eyni zamanda, Səhiyyə Nazirliyi xəstəliyə yoluxmuş şəxsin Azərbaycandan marşrut avtobusu ilə gedərkən əlaqədə olduğu şəxslər barədə heç bir məlumat vermir. -06D-