Azərbaycan Strasburq Məhkəməsinin qərarlarının icra olunmamasında "liderlər" arasındadır

Avropa Şurası Nazirlər Komitəsinin aprelin 11-də dərc etdiyi illik hesabatında 2023-cü ildə Avropa İnsan Hüquqları Məhkəməsinin qərarlarının yerinə yetirilməsində böyük irəliləyiş olduğu qeyd edilir.

Belə ki, ötən il 982 iş bağlanıb. 31 dekabr 2023-cü il tarixinə üzv dövlətlərə qarşı baxılan işlərin ümumi sayı 3819 olub, onlardan 1071-i "prioritet" olub.

Azərbaycana aid hissədə qeyd edilir ki, 2023-cü ildə AİHM-dən Nazirlər Komitəsinə icrasına nəzarət üçün 84 iş daxil olub.

2022-ci ildə bu göstərici 49 iş, 2021-ci ildə isə 46 iş təşkil edib.

Bu göstəriciyə görə Azərbaycan Aİ ölkələri arasında "liderlərdən" olub. Nazirlər Komitəsinə nəzarət üçün ən çox iş - 125 iş Ukrayna üzrə, İtaliya və Rumıniyanın hər biri üzrə 87 iş daxil olub.

31 dekabr 2023-cü il tarixinə AİHM-nin icraatında Azərbaycandan 337 iş olub. 2022-ci ildə bu işlərin sayı 285, 2021-ci ildə 271 olub.

Bu göstəriciyə görə Azərbaycan yalnız Ukrayna (766), Rumıniya (476) və Türkiyədən (446) öndə olaraq, sondan 4-cü yeri tutur.

Azərbaycan üzrə 21 iş "prioritet" olub. Bu kateqoriyadan 14 işə baxılması beş il və daha çox davam edib.

2023-cü ildə Nazirlər Komitəsi Azərbaycanla bağlı 32 işi bağlayıb.

İcrasını gözləyən qərarlar arasında əsas yeri qanundan sui-istifadə nəticəsində həbslərlə bağlı qərarlar tutur.

2023-cü ildə AİHM-də aşkar edilmiş yeni pozuntulardan əksəriyyəti birləşmək azadlığı və ədalətli məhkəmə təhqiqatı hüququna aid olub.

2023-cü ildə AİHM-nin təyin etdiyi təzminatların tam ödənilməsi 63 halda təmin olunub.

Bu zaman müddəti keçən 45 işdə gecikməyə görə tam ödənişin və / və ya faizlərin təsdiq olunacağı gözlənilirdi.