Azərbaycan və Bolqarıstan təkcə enerji sahəsində deyil, digər sahələrdə də əməkdaşlığı gücləndirəcəklər

Bakı/21.07.22/Turan: Bolqarıstanın baş naziri Kiril Petkov iyulun 21-də Bakıya işgüzar səfərə gəlib. O, Prezident İlham Əliyevlə təkbətək görüş keçirib, daha sonra isə nümayəndə heyətlərinin iştirakı ilə görüş olub.

“Biz tez-tez telefonla ikitərəfli münasibətlərin çox vacib məsələlərini müzakirə edirdik. Mən şadam ki, indi ölkəmizə gəlmisiniz və əməkdaşlığımızla bağlı məsələlər ətrafında geniş fikir mübadiləsi aparmaq imkanı var”, - Əliyev deyib.

“Enerji təhlükəsizliyi məsələləri bu gün qlobal gündəmin əsas prioritetləridir. Mən şadam ki, biz Bolqarıstanla enerji sahəsində əməkdaşlıq qurmuşuq və siz Cənub Qaz Dəhlizi kəməri ilə qaz alırsınız”, - deyə Əliyev bildirib.

Petkov cavabında Azərbaycanın son altı ayda Bolqarıstana göstərdiyi dəstəyə görə minnətdarlığını bildirib. O, Bolqarıstanın Azərbaycanla təkcə enerji deyil, bütün digər sahələrdə əməkdaşlığı gücləndirməyə hazır olduğunu bildirib. O əlavə edib ki, Bolqarıstan da Avropa İttifaqı çərçivəsində Azərbaycana dəstək verməyə hazırdır.

Nümayəndə heyətlərinin iştirakı ilə keçirilən görüşdə İ.Əliyev qeyd edib ki, iki ölkə Asiyadan Avropaya dəmir yolu ilə tranzit daşımaları sahəsində uğurla əməkdaşlıq edə bilər.

Kiril Petkov bir daha vurğulayıb ki, Bolqarıstan Azərbaycanın çətin anlarında köməyini və dəstəyini unutmayacaq və həmişə yanında olacaq. O, Azərbaycanla yüksək texnologiyalar, logistika, Avropaya ixrac, enerji sahələrində əməkdaşlığı gücləndirməyə hazır olduğunu bildirib. -02D-