Azərbaycan və Çin arasında hərbi yardım haqqında sənəd imzalanıb

Bakı/27.04.18/Turan: Aprelin 27-də Çin Xalq Respublikası (ÇXR) Dövlət Şurasının üzvü, ÇXR-in milli müdafiə naziri Vey Fenxen və Azərbaycanın müdafiə naziri Zakir Həsənovun görüşü oluib.

V.Fenxen hər iki ölkənin hərbi sahədə əməkdaşlığı barədə danışan Çin n aziri bu istiqamətdə böyük potensialın olduğunu bildirib.

Qarabağ probleminə toxunan V.Fenxe münaqişənin beynəlxalq hüququn norma və prinsiplərinə uyğun, Azərbaycanın ərazi bütövlüyü çərçivəsində həllinin tərəfdarı olduğunu xüsusi qeyd edib.

Z.Həsənov Çin ilə hərtərəfli əməkdaşlığın Azərbaycanın xarici siyasətinin prioritet istiqamətlərindən biri olduğunu söyləyib.

Hər iki ölkə rəhbərlərinin və rəsmi şəxslərin qarşılıqlı səfərlərinin daimi xarakter aldığını deyən Z.Həsənov bunu mövcud dostluq münasibətlərinin, əməkdaşlığın daha da möhkəmlənməsinə mühüm töhfə kimi dəyərləndirib.

Qarabağ problemi barədə danışan müdafiə naziri Ermənistanın Azərbaycana qarşı 25 ildən artıq davam edən işğalçılıq siyasəti apardığını bildirib və işğalçılıq siysətini bütün regionda sülhə və təhlükəsizliyə ciddi təhdid sayıb.

Z.Həsənov Qarabağ münaqişəsinə münasibətdə Azərbaycanın ədalətli mövqeyini dəstəklədiyinə görə təşəkkürünü bildirib və "Vahid Çin" siyasətinə Azərbaycanın hörmətlə yanaşdığını vurğulayıb.

Görüşdə hərbi, hərbi-texniki, hərbi təhsil və qarşılıqlı maraq doğuran digər sahələrdə əməkdaşlığın inkişaf perspektivləri müzakirə edilib.

Görüşün sonunda Azərbaycan Müdafiə Nazirliyi ilə Çin Milli Müdafiə Nazirliyi arasında hərbi yardımın göstərilməsinə dair sənəd imzalanıb.

Xatırladaq ki, müdaiə naziri Z.Həsənov aprelin 26-da Çinə səfərə gedib.--0--