Azərbaycan və Gürcüstan arasında quru sərhədin mühafizəsi yaxşılaşdırılacaq

  Bu gün Fairmont otelində Avropa İttifaqı və BMT-nin İnkişaf Proqramı ilə birgə “Azərbaycan və Gürcüstan arasında quru sərhədin mühafizəsinin daha yaxşı əlaqələndirilməsi” adlı layihənin həyata keçirilməsi barədə sənəd imzalanıb. Bu barədə Turana BMT-nin Bakı ofisindən bildiriblər.

Tədbirdə Avropa İttifaqının Azərbaycan və Gürcüstan nümayəndələri ilə yanaşı, Azərbaycan (XİN, DGK, DSX) və Gürcüstanın (Sərhəd Polisi) müvafiq hökumət qurumlarının rəhbər səlahiyyətli şəxsləri, BMT-nin İnkişaf Proqramının Azərbaycan və Gürcüstan ofislərinin, İSMPD-nın (Beynəlxalq Miqrasiya Siyasətinin İnkişaf Mərkəzi) və ATƏT-in Bakı Ofisinin nümayəndələri, eləcədə Avropa İttifaqına üzv tərəfdaş ölkələrin Azərbaycanda akkreditə olunmuş səfirləri iştirak edib.

İki ölkə arasında yaşıl sərhəddə əsasən təhlükəsizlik məsələlərini əhatə edəcək layihə çərçivəsində əlaqələndirilmiş tədbirlər mexanizminin yaradılması və tətbiqi üçün Azərbaycan və Gürcüstanın sərhəd orqanlarının birgə fəaliyyətləri daha da inkişaf etdiriləcək, Azərbaycan  Dövlət Sərhəd Xidməti ilə Gürcüstanın Sərhəd Polisi arasında əməkdaşlığın gücləndiriləcək, quru sərhəd mühafizə və nəzarət prosedurlarının təkmilləşdiriləcək, iki ölkənin sərhəd mühafizə orqanları üçün təlim proqramlarının hazırlanacaq və müasir infrastrukturun yaradılaraq yüksək texnologiyalı  avadanlıqlarla təchiz ediləcəkdir.-0-