Azərbaycan və Niderland investisiyaları təşviq edəcək

Niderland və Azərbaycan arasında ticarət-iqtisadi əməkdaşlıq dinamik şəkildə inkişaf edir. 2012-ci ildə iki ölkə arasında ticarət dövriyyəsi 300 mln. avro təşkil edib ki, bu da 2011-ci ilin göstəricilərindən iki dəfə çoxdur. Bu məlumatları bugünki mətbuat konfransında Niderlandın Bakıdakı səfiri Aryen Uijtirlende (Arjen Uijterlinde) açıqlayıb.

Onun sözlərinə görə, iqtisadi əməkdaşlığın gələcəkdə daha da genişləndirilməsi nəzərdə tutulur. 

2013-cü ildə Azərbaycana iki ticari missiya gələcək və investisiyaların qarşılıqlı müdafiəsi və təşviqi haqqında sazişlərin imzalanacağı gözlənilir.

Səfir energetika, kənd təsərrüfatı, su resursları, idman sahəsindəəməkdaşlığın inkişafı imkanlarını qeyd edib.

Mətbuat konfransı Niderlandın milli bayramı, hər il aprelin 30-da qeyd olunan Kraliça Gününə həsr olunub.

Lakin monarxın dəyişməsi ilə əlaqədar gələcəkdə bu bayram Kral Günü adlandırılacaq və aprelin 27-də qeyd ediləcək. 

Qeyd edək ki, aprelin 30-da Villem-Aleksandr Oranski-Nassau (Vilhelm-Aleksandr) – kraliça Beatriksin böyük oğlu Niderlandın yeni kralı olub. 

Amsterdamda xüsusi mərasim zamanı kraliça təntənəli oalraq oğlunu xeyrinə hakimiyyətdən getdiyini elan edib. Yeni monarx 46 yaşındadır, təhsilinə görə tarixçidir. -06D-