Azərbaycan və Özbəkistan müttəfiqlik münasibətləri haqqında Saziş imzalayıblar

Bu gün Daşkənddə Özbəkistan və Azərbaycan prezidentləri Şavkat Mirziyoyev və İlham Əliyevin sədrliyi ilə iki ölkənin Ali Dövlətlərarası Şurasının ilk iclası keçirilib.

Özbəkistan prezidentinin saytı xəbər verir ki, Mirziyoyev Əliyevin səfərini tarixi hadisə adlandırıb.

“Bu gün biz müttəfiqlik münasibətləri haqqında Müqavilə imzalayacağıq. Cəmi bir neçə il ərzində biz birlikdə Özbəkistan-Azərbaycan münasibətlərini dövlətlərarası qarşılıqlı fəaliyyətin ən yüksək səviyyəsinə qaldıra bildik”, - deyə Şavkat Mirziyoyev bildirib.

İlk görüşün keçirilməsi də məmnunluqla qeyd olunub

Liderlər ikitərəfli əlaqələrin dinamik inkişafını qeyd ediblər.

Bundan əlavə, gələn ilin Özbəkistan və Azərbaycan arasında İqtisadi Əməkdaşlıq İli elan edilməsi və 20 prioritet istiqaməti əhatə edən hərtərəfli Proqramın qəbul edilməsi barədə razılıq əldə olunub.

Məlumatda daha sonra deyilir ki, ticarət həcminin dəfələrlə artırılması və sənaye əməkdaşlığının yeni mərhələsinə, o cümlədən üçüncü ölkələrdə layihələrin həyata keçirilməsinə keçid üçün vəzifələr qoyulub.

Tərəflər bir gün əvvəl keçirilmiş və 2 milyard dollardan çox perspektivli layihələr portfelinin formalaşdırıldığı biznes forumun nəticələrini alqışlayıblar. Söhbət energetika, kimya, mədənçıxarma, toxuculuq sənayesi, kənd təsərrüfatı, şəhərsalma və digər sahələrdə əməkdaşlıqdan gedir.

Bu kontekstdə belə layihələrin dəstəklənməsi vasitəsi kimi Özbəkistan-Azərbaycan investisiya şirkətinin səmərəli fəaliyyəti qeyd olunub.

Nəqliyyat, rabitə, enerji və digər infrastruktur layihələrinin, o cümlədən çoxtərəfli formatda həyata keçirilməsi yolu ilə iki ölkə arasında qarşılıqlı əlaqənin gücləndirilməsinin zəruriliyi qeyd edilib.

Tərəflər uçuşların tezliyinin artırılması, quru və hava daşımaları üçün prosedurların mümkün qədər sadələşdirilməsi, rəqəmsal həllərin tətbiqi barədə razılığa gəliblər.

Regionlararası təmasların intensivləşdirilməsinin vacibliyi qeyd edilib. 2025-ci il üçün ayrıca Regionlararası Əməkdaşlıq Planının, iki ölkənin regionlarının sənaye potensialının və infrastrukturunun inkişafı üzrə Tərəfdaşlıq Proqramının qəbul edilməsi və növbəti Regionlar Forumunun Kokand şəhərində keçirilməsi barədə razılıq əldə olunub.

Dövlət başçıları həmçinin beynəlxalq və regional gündəliyə dair fikir mübadiləsi aparıb, çoxtərəfli strukturlar çərçivəsində intensiv dialoqun davam etdirilməsi və qarşılıqlı dəstək məsələlərini müzakirə ediblər.

İclasın yekununda əldə olunmuş razılaşmaların vaxtında və keyfiyyətli icrası üçün “Yol xəritəsi”nin qəbul edilməsi qərara alınıb.