Azərbaycan Xalq Cəbhəsi Partiyası Azərbaycanda yeni repressiya dalğasını pisləyib

Azərbaycan Xalq Cəbhəsi Partiyası jurnalistlərin və fəalların son həbslərini pisləyib.

Bəyanatda qeyd olunur ki, Azərbaycan Xalq Cəbhəsi Partiyası bütün təqib və təzyiqlərə baxmayaraq, bundan sonra da ölkədə "totalitar rejim"in yaradılması planlarına qarşı qətiyyətli mübarizə aparacaq və bu yoldan dönməyəcək.

“Azərbaycan hakimiyyəti COP29-dan dərhal sonra ölkədə yeni repressiya dalğası başladıb.

Dekabrın 3-dən 10-dək daha 9 nəfər - hüquq müdafiəçisi Rüfət Səfərov, “Meydan” TV-nin əməkdaşları Aynur Elgünəş, Aytac Tapdıq, Xəyalə Ağayeva, Aysel Umudova, Natiq Cavadlı və Ramin Deko, başqa bir jurnalist Ülvi Tahirli və müstəqil siyasətçi, Siyasi Menecment İnstitutunun rəhbəri Azər Qasımlı müxtəlif qondarma ittihamlarla həbs ediliblər. Artıq onların hər birinin barəsində 4 ay müddətinə həbs qətimkan tədbiri seçilib. Onlardan əlavə, eyni vaxtda jurnalist-fotoqraf Əhməd Muxtar da saxlanılaraq, qurama ittihamla 20 sutka inzibati həbsə məhkum edilib”, - bəyanatda deyilir.

Qeyd olunur ki, dekabrın 10-da Azərbaycan Xalq Cəbhəsi Partiyası Daşkəsən şöbəsinin sədri, bu ilin mart ayında narkotik maddə ittihamı ilə şərlənərək həbs edilən Sahib Məmmədzadənin barəsində məhkəmə 6 il 6 ay müddətinə həbs hökmü çıxarıb.

“Beləliklə, ölkədə uzun müddətə həbs edilmiş siyasi məhbusların sayı 1 həftənin içində 319 nəfərdən  328 nəfərə çatıb”, - bəyanatda qeyd edilir.

Partiya bildirir ki, bu həbslər hakim rejimin illərdir ölkədə apardığı “demokratik təsisatları və potensialı tamamilə məhv etmək siyasətinin tərkib hissəsidir”.

“Məqsəd yenə də söz və fikir azadlığına, insan haqlarını müdafiə işinə, müxalif siyasi təşəbbüslərə zərbə vurmaqdır. Hakimiyyət ölkədə müstəqil medianın, hüquq müdafiəçiliyinin və siyasi fəaliyyət imkanlarının son qalıqlarını da aradan qaldırmaq istəyir. Bu mənada Azərbaycan Xalq Cəbhəsi Partiyasının sədri Əli Kərimli üzərində bu ilin avqust ayından dekabr ayına qədər davam etmiş və onun 1500 manat cərimələnməsi haqda qərarla başa çatmış sifarişli məhkəmə işi də yeni repressiya dalğasına daxildir. Yeri gəlmişkən, Əli Kərimliyə qarşı məhkəmə proseslərində ona dəstək məqsədilə məhkəmə binası önünə toplaşan Azərbaycan Xalq Cəbhəsi Partiyası fəalları və tərəfdarları da təzyiqlərə məruz qalıb. Dekabrın 2-də keçirilən son proses zamanı isə binanın önündə toplaşanlara aşırı polis zorakılığı göstərilib, onlardan bir çoxu saxlanılıb və 2 nəfərə 30 və 15 sutka olmaqla inzibati həbs, 4 nəfərə isə hər birinə 200 manat olmaqla, cərimə cəzası verilib. Üstəlik, saxlanılan şəxslər polislər tərəfindən qəddarlıqla döyülüb. Məhkəmə öncəsi də Azərbaycan Xalq Cəbhəsi Partiyasının 2 nəfər fəalı 15 və 25 sutka olmaqla, inzibati həbs, 1 nəfər fəalı isə 50 manat cərimə cəzasına məhkum edilib”, - sənəddə deyilir.

Azərbaycan Xalq Cəbhəsi Partiyası AXCP beynəlxalq birliyi, ABŞ, Avropa İttifaqı və Böyük Britaniya hökumətlərini Azərbaycanda müstəqil medianın, vətəndaş cəmiyyətinin və siyasi müxalifətçiliyin tamamilə məhv edilməsinə seyrçi qalmamağa, baş verənlərə adekvat şəkildə etirazlarını bildirməyə, artıq totalitarizmə keçidin qarşısını almaq üçün ünvanlı sanksiyalar da daxil, ciddi və sərt tədbirlər görməyə çağırır.

Hakimiyyət isə ölkədə fundamental insan hüquqlarının pozulmadığını və siyasi məhbusların olmadığını bildirir.