Azərbaycan Xarici İşlər Nazirliyi: Avropa İttifaqının Azərbaycanda insan hüquqlarının vəziyyəti ilə bağlı bəyanatı saxtakarlıqlarla doludur

Avropa İttifaqının (Aİ) xarici siyasət və təhlükəsizlik məsələləri üzrə mətbuat katibi Peter Stano tərəfindən səsləndirilən qərəzli və qəbuledilməz bəyanatı tamamilə rədd edirik. Bu barədə Xarici İşlər Nazirliyinin mətbuat xidmətinin rəhbəri Ayxan Hacızadənin Avropa İttifaqının xarici siyasət və təhlükəsizlik məsələləri üzrə mətbuat katibi Peter Stanonun mayın 29-da Azərbaycanda insan hüquqlarının vəziyyəti barədə bəyanına dair şərhində deyilir.

Hacızadə bildirib ki, Avrop İttifaqının nümayəndəsinin bəyanatı Azərbaycanda insan hüquqlarının vəziyyəti ilə bağlı reallıqdan uzaq olmaqla yanaşı, "açıq-aşkar saxtakarlıqlarla doludur".

"Müəyyən fəaliyyətlərin qeyri-qanuni maliyyələşdirilməsi, qanunsuz maliyyə əməliyyatları və s. kimi bir sıra cinayət araşdırmaları ilə əlaqədar saxlanılan şəxslərin məsələsi müvafiq cinayət icra rejimi qanunlarının tələbləri çərçivəsində həyata keçirilir. Cinayət işlərinin və təhqiqatların, habelə məhkəmə qərarlarının nəticələrini gözləmək əvəzinə, təqsirləndirilən şəxslərin azad edilməsi üçün Azərbaycana çağırışların edilməsi hüquqi prosedurlarla açıq ziddiyyət təşkil edir", deyə o qeyd edib.

Xarici İşlər Nazirliyinin rəsmisi həmçinin saxlanılan şəxslərin tibbi və digər yardımdan məhrum edilməsi ilə bağlı iddiaların heç bir əsasının olmadığını bildirir.

"Avropa İttifaqının istinad etdiyi bütün şəxslər qanunla müəyyən edilmiş qayda və çərçivədə lazımi yardımla təmin olunurlar. Avropa İttifaqının bir sıra Avropa ölkələri və siyasətçilərinin siyasi baxımdan verdikləri üstünlüklər əsasında müəyyən şəxsləri əfv etmək üçün əsassız ictimai tələbləri Avropanın qanunun aliliyinə həqiqətən sadiq olduğunu şübhə altına alır. Azərbaycan bu sahədə kifayət qədər təcrübəyə, biliyə, müdrikliyə malikdir, beləliklə məcburedici məsləhət və göstərişlərə ehtiyac duymur", deyə Hacızadə bildirib.

Onun fikrincə, Azərbaycanın COP29-a sədrliyinin bu prosesə aidiyyəti olmayan siyasi motivlərlə şərtləndirilməsi, ölkəsinin öhdəliyi daxil olmaqla, iqlim dəyişikliyi ilə mübarizədə əməkdaşlıq istiqamətində ideyanın mahiyyətinə ziddir.

"Azərbaycan beynəlxalq hüquqi öhdəliklərini yerinə yetirməyə bundan sonra da davam edəcək və Aİ-nin müəyyən institutlarını İttifaq ərazisində insan hüquqlarının kobud şəkildə pozulmasına diqqət yetirməyə, Azərbaycana qarşı müdaxilə və təxribatlarını dayandırmağa çağırır", deyə Hacızadə qeyd edib.

Avropa İttifaqı mayın 29-da yaydığı bəyanatında Azərbaycan prezidenti İlham Əliyevin mayın 25-də əfv sərəncamı imzaladığını, ancaq keçmişdən fərqli olaraq, bu dəfə əfv edilənlər sırasında "fundamental hüquqlarını həyata keçirdiklərinə görə cəza çəkən" şəxslərin yer almadığını vurğulayıb.

Avropa İttifaqı Azərbaycan hakimiyyətini əsassız yerə həbs edilən bütün şəxsləri azad etməyə, həbsdə olanların hüquqlarını, o cümlədən onlar üçün ləyaqətli və təhlükəsiz şəraiti təmin etməyə çağırıb.