Azərbaycan Xarici İşlər Nazirliyi: Azərbaycanın Tehrandakı səfirliyinə hücum planlaşdırılmış terror aktıdır

Bakı/06.02.23/Turan: Bazar ertəsi Azərbaycan Xarici İşlər Nazirliyində yanvarın 27-də Tehrandakı Azərbaycan səfirliyinə terror hücumu ilə bağlı brifinq keçirilib. Terror hücumu zamanı diplomatik missiyanın mühafizə rəisi Orxan Əsgərov öldürülüb, onun iki tabeliyində olan Vasif Tağıyev və Mahir İmanov yaralanıb.

Azərbaycan Xarici İşlər Nazirliyinin mətbuat xidmətinin rəhbəri Ayxan Hacızadə hücumun başvermə şəraiti barədə xronoloji ardıcıllıqla məlumat verib və bunun planlı terror aktı olduğunu bildirib.

Belə ki, yanvarın 27-də səhər terrorçu hücum üçün əlverişli an seçmək məqsədilə səfirliyin yanından iki dəfə -saat 08:05-də və 08:24-də keçib.

Saat 08:32-yə yaxın səfirliyin iki əməkdaşı diplomatik missiyanın binasına daxil olanda terrorçu öz avtomobilini səfirliyin park edilmiş avtomobilinə çırpıb.

O, işçilərin səs-küyə çıxacağını nəzərə alıb və açılan qapıdan istifadə etməklə avtomatdan atəş açaraq içəri girib. Eyni zamanda terrorçu səfirliyin qapısında postda dayanan İran polisinə əliylə işarə verib.

İki dəqiqədən sonra- saat 08.34-də səfirliyin qarşısında İran polisinin avtomobili görünüb, səfirliyin yanında dayanan polislə qısa söhbətdən bir neçə saniyə sonra ərazini tərk edib.

Bu vaxt səfirliyin binasında 4 dəqiqə ərzində 08.32-dən 08.36-dək terrorçu atəş açıb. Nəticədə Orxan Əsgərov aldığı yaralardan hadisə yerində ölüb. Digər mühafizəçi Mahir İmanov qolundan və ayağından ağır yaralar alıb. Daha bir əməkdaş Vasif Tağıyev terrorçunu tərksilah etmək üçün onunla əlbəyaxa olub.

Bu zaman terrorçu atəş etməyə davam edib və Tağıyevi çiynindən yaralayıb. Buna baxmayaraq, Tağıyev terrorçunun avtomatından maqazini çıxara bilib. Bundan sonra hücumçü cibindən "Colt" tapançasını çıxarıb və bu dəfə Tağıyevi çənəsindən yaralayıb. İki dəfə yaralanmasına baxmayaraq, Tağıyev terrorçunu binadan çıxarıb qapını bağlamağı bacarıb.

Bütün bunlara baxmayaraq, səfirliyin qapısındakı iranlı polis nəinki müdaxilə etməyib, həttta ərazidən çəkilib.

Bu vaxt terrorçu cibindən ehtiyat maqazin çıxarıb avtomata taxıb, iki dəfə əliylə kiməsə işarə edib. O, səfirliyin qapısına, eləcə də səfirlik əməkdaşlarının ailə üzvlərinin yaşadığı binanın yuxarı mərtəbələrinin pəncərələrinə atəş açıb.

Bundan sonra səfirliyin avtomobilinin təkərlərinə benzin töküb yandırıb. Sonra avtomobilinin baqajından bir çəkic çıxarıb qapıları sındıraraq yenidən səfirliyə girib.

Avtomatdan atəş açaraq ikinci mərtəbəyə qalxmağa çalışıb. Lakin mühafizəçi Tağıyev yanğınsöndürənlə onun başına zərbə endirib və yaralayıb. Bundan sonra terrorçu səfirliyi tərk edib. Çıxaraq yenidən səfirliyin avtomobilinə benzin töküb və yandırıb, ancaq özünü yandırıb. Bundan sonra səfirliyin qarşısında İran polisləri və yanğınsöndürənlər gəlib.

Lakin polis terrorçunu tutmağa tələsməyib, onunla söhbət edib. Terrorçu diplomatları təhdid etməyə davam edərək  "hamını öldürəcəyilə" hədələyib.

Polis buna reaksiya verməyib və o, çəkici yenidən öz  avtomobilinin baqajına qoyub.

Bundan əlavə, terrorçu səfirliyin əməkdaşı Tağıyevi bayıra çıxmağa çağırıb və o enəndə yenidən ona hücum etməyə cəhd edib. Bundan sonra polis hücumçunu saxlayıb və ərazidən çıxarıb.

Kamerada maskalı bir adamın terrorçunun avtomobilindən naməlum əşyaları götürüb ərazidən uzaqlaşdığı barədə görüntülər var.

"İranda hücum üçün istirahət gününün seçilməsi, ehtiyat maqazinli avtomatik silahın və tapançanın, yandırıcı qatışığın olması, İran polisinin müdaxilə etməməsi  bunun planlı terror aktı olduğunu deməyə əsas verir", - Hacızadə bildirib.

O, terrorçunun hərəkətinin guya ya səfirlikdə gizlənən, ya da Azərbaycana gedən həyat yoldaşının axtarışı ilə bağlı olması barədə İran mətbuatının fikirlərini qəbul etməyib.

Bunu təsdiqləyən heç bir fakt yoxdur. Hacızadənin sözlərinə görə, İran tərəfindən bu barədə səfirliyə heç bir müraciət olmayıb.

İndiyədək İran tərəfi baş verənlərlə bağlı izahat verilməsi, terror aktında əli olanların barəsində görülən tədbirlərlə bağlı Azərbaycanın tələbinə cavab verməyib.

Bu terror aktı Azərbaycan-İran münasibətlərinin pisləşməsinə gətirib çıxarıb ki, bu da sözsüz ki, ikitərəfli əlaqələrin digər sahələrinə də təsir edir.

Turan-ın müxbirinin “İran tərəfi obyektiv araşdırma aparmasa, diplomatik münasibətlərin tam pozulması mümkündürmü?” sualına cavabda Hacızadə bu mərhələdə qiymətləndirmədən çəkinib və deyib ki, hansı addımların atılacağını vaxtından əvvəl deyə bilməz.

Azərbaycan Xarici İşlər Nazirliyi videomüşahidə kameralarından görüntüləri və səfirliyin yaralı əməkdaşlarının ifadələrini əks etdirən videomaterial yayıb. 06B