Azərbaycan XİN Aİ səfirinə Aİ müşahidəçilərinin Ermənistanda fəaliyyəti ilə bağlı narazılığını bildirib

Avropa İttifaqının (Aİ) Azərbaycan Respublikasındakı səfiri Peter Mixalko fevralın 12-də Xarici İşlər Nazirliyinə çağırılıb.

Bu barədə Xarici İşlər Nazirliyindən məlumat verilib. 

Məlumata görə, görüş zamanı Aİ-nin Ermənistandakı Monitorinq Missiyasının əldə olunmuş ilkin razılıqlara zidd olan fəaliyyətinin ciddi narahatlıq doğurduğu bir daha diqqətə çatdırılıb.

Sözügedən missiyanın regional sabitlik, habelə Azərbaycanla Ermənistan arasında etimad quruculuğuna töhfə vermək kimi bəyan edilmiş məqsədlərinə zidd olaraq, Azərbaycan əleyhinə təbliğat vasitəsi kimi geniş şəkildə sui-istifadə olunduğu qeyd edilib.

Məlumatda deyilir ki, missiyanın mahiyyət etibarilə müxtəlif Avropa rəsmilərinin, habelə qeyri-rəsmi nümayəndə heyətlərinin sərhəd bölgələrinə səfərlərinin təşkilinə töhfə verən "binokl diplomatiyası"nın agentinə çevrildiyi Aİ tərəfinin diqqətinə çatdırılıb. 

Görüş zamanı istisnasız olaraq bu qəbildən olan bütün səfərlərdən Azərbaycana qarşı nifrətin yayılması, habelə əsassız Azərbaycanofobiyanın genişləndirilməsi üçün istifadə olunduğu qeyd edilib.

Nazirliyin məlumatında deyilir ki, "binokl diplomatiyası”nın bu fəallığının sərhəd boyunca indiyədək görülməmiş sakitliyin hökm sürdüyü, habelə həm Azərbaycanın, həm də Ermənistanın ciddi etimad quruculuğu tədbirləri həyata keçirdiyi bir zamanda müşahidə olunmasının xüsusilə narahatlıq doğurduğu bildirilib.

 "Bununla yanaşı, monitorinq missiyasının məsul olduğu bölgələrdə qanunsuz keçid cəhdinin qarşısının alınması ilə bağlı son hadisə, bu missiyanın bəyan edilmiş tapşırıqlarına ciddi kölgə salır. Bu qəbildən narahatlıq doğuran fəaliyyət heç bir şəkildə qeyd olunan missiyanın neytral bir aktor kimi inam və etimad quruculuğuna töhfə verməklə bağlı bəyan edilmiş məqsədlərinə uyğun gəlmir", deyə məlumatda qeyd olunur.

Məlumata görə, Ermənistan ərazisində yerləşdirilən missiyanın bəyan edilmiş mandatına uyğun olaraq neytral, mülki və silahsız missiya kimi fəaliyyət göstərməsi, habelə Azərbaycanın suverenliyinə, ərazi bütövlüyünə qarşı yönəlmiş və ya onun legitim təhlükəsizlik maraqlarına bu və ya digər şəkildə təsir edəcək hər hansı fəaliyyətdən çəkinməsini təmin etmək üçün bütün lazımi tədbirlər görməyə dair Aİ tərəfinə ciddi şəkildə çağırış edilib.

Xatırladaq ki, fevralın əvvəllərində Azərbaycan KİV-ləri sərhəddə Ermənistan tərəfdən Azərbaycana keçməyə çalışan Çexiya vətəndaşının saxlanıldığı haqqında məlumat yayıblar. Elə həmin mənbələrin məlumatına görə, bu şəxs Aİ-nin Ermənistandakı müşahidə missiyasının üzvüdür. 

* Aİ missiyası Ermənistana 2022-ci ilin oktyabrıında, iki ölkənin sərhədində çox sayda tələfatla nəticələnən silahlı toqquşmalar baş verdikdən sonra göndərilib. Azərbaycan öz ərazisində Aİ missiyası yerləşdirməkdən imtina edib.