Azərbaycan XİN Paşinyana beynəlxalq hüquq müddəalarını xatırladır

Bakı/12.11.18/Turan: Ermənistan baş naziri vəzifələrini yerinə yetirən Nikol Paşinyanın noyabrın 11-də Paris Sülh Forumundakı çıxışı Ermənistanın xarici siyasəti ilə tamamilə ziddiyyət təşkil edir. Məhz Ermənistan beynəlxalq hüququn fundamental prinsiplərini, xüsusilə də güc tətbiq etməmək prinsipini pozaraq Azərbaycan ərazilərini işğal edib və tarixən Dağlıq Qarabağda yaşayan yüz minlərlə Azərbaycanlını öz evlərində yaşamaq fundamental hüququndan məhrum edib. Bu barədə Azərbaycan XİN-in noyabrın 12-də yaydığı şərhində deyilir.

Öz müqəddəratını təyin etmə eyni bölgədə yaşayan digər etnik qruplara qarşı etnik təmizləmənin həyata keçirilməsi demək deyil, beynəlxalq hüququn aliliyi ərazilərin hərbi işğal etmək və sonra da zor gücünə işğalın nəticələrini həll yolu kimi qəbul etdirmək demək deyil.

Bölgənin və Ermənistanın özünün daha yaxşı gələcəyi bilavasitə Ermənistan silahlı qüvvələri tərəfindən Azərbaycan ərazilərinin işğalına son qoyulması və məcburi köçkünlərin öz evlərinə geri qayıtması ilə əlaqədardır, deyə şərhdə bildirilir.

Azərbaycan XİN başçısı Elmar Məmmədyarov elə həmin Paris Sülh Forumunda çıxış edərkən deyib ki, Ermənistan silahlı qüvvələrinin işğalçı əməlləri nəticəsində Azərbaycanda olduğu kimi, bu gün hələ də dünyada xalqlar öz doğma ərazilərindən zor gücünə qovularaq etnik təmizləməyə məruz qalırlar.

Qeyd edək ki, Nikol Paşinyan Dağlıq Qarabağ xalqının öz müqəddəratını təyin etmək hüququ uğrunda uzunillik mübarizəsi hələ lazımi hüquqi həllini tapmayıb. "XXI əsrdə xalqın öz müqəddəratını təyin etmək hüququnu tətbiq etmək istəyinin bioloji mövcudluğa təhdid halına gəlməsi tamamilə qəbuledilməzdir".

"Heç bir dövlət öz uğurunu başqalarının miskinliyi üzərində qura bilməz, heç kim başqalarının köləliyi hesabına azadlıq əldə edə bilməz". -02D-