Azərbaycan Yeni Kaledoniyadakı etirazlarla hər hansı əlaqəsinin olduğu haqqında iddiaları rədd edir

Azərbaycan XİN-in rəsmi nümayəndəsi Ayxan Hacızadə Fransa DİN başçısı Jerar Darmanenin "Azərbaycana qarşı, eləcə də Azərbaycanla Yeni Kaledoniyanın müstəqillik tərəfdarlarının liderləri arasında iddia edilən münasibətlərə dair səsləndirdiyi növbəti əsassız fikirləri" rədd edir. 

"İlk növbədə, Fransa tərəfinin Azərbaycana qarşı təhqiramiz ifadələrini bir daha qətiyyətlə pisləyir və ermənilərin kütləvi şəkildə qətlə yetirilməsi kimi qəbuledilməz ittihamlarla Azərbaycana qarşı apardığı qarayaxma kampaniyasını dayandırmağı tələb edirik", deyə Hacızadənin şərhində bildirilir.

"Fransa daxili işlər nazirinin öz ölkəsinin uzun illər həyata keçirdiyi müstəmləkəçilik siyasətinin tərkib hissəsi kimi yerli xalqlara qarşı insanlıq əleyhinə cinayətlər törətməsini, milyonlarla günahsız insanın vəhşicəsinə qətlə yetirilməsi tarixini xatırlaması daha münasib olardı".

Bununla yanaşı, Fransanın DİN başçısı Azərbaycanı Yeni Kaledoniyada müstəqillik tərəfdarı etirazları dəstəkləməkdə ittiham etmək əvəzinə, ölkəsinin bu cür etirazlara səbəb olan dənizaşırı bölgələri ilə bağlı uğursuz siyasətinə diqqət yönəltməlidir, Azərbaycan XİN-in rəsmi nümayəndəsi belə hesab edir.

Qeyd edək ki, Darmanen Azərbaycanın Yeni Kaledoniyadakı etirazlarla əlaqəsi olduğunu bildirib. "Təəssüf ki, Kaledoniyanın müstəqilliyini müdafiə edən liderlərin bir hissəsi Azərbaycanla saziş bağlayıb... Buna şübhə yoxdur", deyə o, "France-2" telekanalına müsahibəsində bildirib.