Azərbaycan Ziyalılar Forumunun təsisçiləri toplantı keçiriblər

Bakı/21.06.13/Тuran:  Iyunun 20-də Azərbaycan Ziyalılar Forumunun təsisçilərinin toplantısı keçirilib. Toplantıda son vaxtlar ölkədə yaranmış social-siyası vəziyyət və mənəvi durum müzakirə edilib. Azərbaycanın sosial həyatında baş verən bəzi neqativ halların artması, insan haqları ilə bağlı vəziyyətin gün-gündən ağırlaşması, seçki öncəsi repressiv metodların güclənməsi, siyasi mövqeyinə görə insanların təqib edilməsi,  beynəlxalq aləmdə Azərbaycanla bağlı bir sıra rüşvətxorluq və korrupsiya hallarının aşkarlanması və digər məsələlər haqqında fikir mübadiləsi aparılıb.   

 

  Toplantıda REAL hərəkatının lideri İlqar Məmmədov, Müsavat Partiyası başqanının müavini Tofiq Yaqublu, tanınmış vəkil Qurban Məmmədov, NİDA gənclər hərəkatının fəalları, bir sıra jurnalist və İslam Partiyası üzvlərinin saxta ittihamlarla həbsdə saxlanmasından ciddi narahatlıq ifadə edilib. 

 

  Müzakirələrdə Azərbaycanın təhsil həyatı ilə bağlı bir sıra məsələlərə də münasibət bildirilib. Xüsusilə, bu yaxınlarda 18 şəhər və rayonun IX və XI siniflərində iki fənn üzrə buraxılış imtahanlarının son dərəcə fəlakətli nəticələri haqqında geniş fikir mübadiləsi aparılıb. Qeyd olunub ki, IX sinif şagirdlərinin 46,6 faizinin ana dilindən və 40,9 faizinin riyaziyyatdan, habelə, XI siniflərdə məzunların 30 faizinin bu fənlərdən iki qiymət alması həyacanlandırıcı hadisədir. Elan olunmuş bu göstəricilər ölkənin sosial həyatının vəziyyətini nümayiş etdirir və belə durum təhsil məsələsi kimi deyil, ölkənin sosial siyasətinin böhranı kimi qiymətləndirilməlidir. Yaranmış vəziyyətin ağırlığını nəzərə alaraq toplantıda qərara gəlinib ki, yaxın vaxtlarda mütəxəssislərin iştirakı ilə ölkənin təhsil həyatında yaranmış bu acınacaqlı durum geniş müzakirə edilsin, vəziyyətdən çıxış yolları aransın. 

 

  Toplantıda eyni zamanda Azərbaycan Ziyalılar Forumuna üzv olmaq üçün edilmiş müraciətlərə baxılıb və tanınmış hüquqşünas Fuad Mustafayevin Forumun Koordinasiya Şurasında təmsil edilməsi məqsədəuyğun sayılıb.