• contact.az Contact
  • Bakı
  • Partly cloudy9.10 C
  • Cümə axşamı, 28 Noyabr 2024
    • flag_EN
    • flag_RU

Son yenilənmə

(3 d. əvvəl)
Akif Muradverdiyev MTN təcridxanasına yerləşdirilib
A- A A+
EN RU
Turan İnformasiya Agentliyi
Turan İnformasiya Agentliyi

Akif Muradverdiyev MTN təcridxanasına yerləşdirilib

Ötən gün qaçaqmalçılıqda ittiham olunaraq həbs edilmiş Prezident Administrasiyasının İşlər İdarəsinin keçmiş rəhbəri Akif Muradverdiyev Milli Təhlükəsizlik Nazirliyinin (MTN) təcridxanasına yerləşdirilib.

 
  A.Muradverdiyevin vəkili Fuad Ağayev onun MTN-də saxlanmasını, ümumiyyətlə həbsini qanunsuz hesab edir. 
 
  F.Ağayev Turan-ın müxbiri ilə söhbətində bildirib ki, “qaçaqmalçılıq” MTN-in araşdırmalı olduğu cinayətlərə aid deyil. Bu, gömrük qurumunun səlahiyyətinə aiddir. 
 
  Digər tərəfdən, A.Muradverdiyevə qarşı irəli sürülən ittiham tamamilə əsassızdır. Belə ki, A.Muradverdiyev qanunsuz olaraq qızıl pulların çıxarılmasına cəhddə təqsirli bilinir.
 
  Vəkil müdafiə etdiyi şəxslə hələ görüşə bilməyib və ittihamın detalları, guya ondan götürülən qızıl pulların sayı barədə dəqiq məlumatı yoxdur. 
 
  A.Muradverdiyevin qohumları bildiriblər ki, o 18 min manat dəyərində qızıl pul qaçaqmalçılığında ittiham olunur.
  Vəkil diqqəti ona yönəldib ki, A.Muradverdiyev neytral zonada saxlanılıb -  aeroportun girişindəki təhlükəsizlik xidmətini, gömrük nəzarətini və sərhəd xidmətini keçdikdən sonra və həmin yerlərdə ona hər hansı bir irad tutulmayıb. 
 
  “Hətta Akif Muradverdiyevdə həmin pullar olsaydı belə, nədən özü ilə ölkədən çıxarmalıydı. Bu, cəfəng ittihamdır”, - F.Ağayev qeyd edib.
 
  O xatırladıb ki, 2005-ci ildə Azpetrol şirkətinin keçmiş rəhbəri, keçmiş iqtisadi inkişaf nazirinin qardaşı Rafiq Əliyev də aeroportda analoji yolla saxlanılmışdı. O zaman onu da iri məbləğdə nağd pul aparmaq cəhdində ittiham etmişdilər. Halbuki, o, çox rahat şəkildə bank kartı ilə gedib pulları xaricdə çıxara bilərdi.  
 
  “Görünür, həbs sifarişini yerinə yetirən hüquq-mühafizə orqanlarının fantaziyası zəifdir və həqiqətəbənzər yeni bir şey fikirləşə bilməyiblər”, - o vurğulayıb.
 
  A.Muradverdiyev bundan əvvəl də cinayət təqibinə məruz qalıb.
 
  2005-ci ildə parlament seçkilərindən əvvəl o, digər yüksək vəzifəli məmurlarla birlikdə dövlət çevrilişinə cəhddə ittiham olunmuşdu. Sonradan bu ittiham iqtisadi ittihamla əvəz olunub və  6 il həbsə məhkum edilib.  Lakin 2008-ci ilin əvvəlində şərti olaraq azadlığa buraxılıb.06B--

Rəy yaz

Siyasət

Bizi sosial şəbəkələrdə izləyin

Xəbər lenti