Azərbaycanda seçkiqabağı kampaniya aşağı səviyyədə keçib

Azərbaycan KİV-də plüralizm səviyyəsi azad, ədalətli və demokratik prezident seçkiləri üçün zəruri imkanları təmin etməyib. Avqust-sentyabr aylarında Reportyorların Azadlıq və Təhlükəsizlik İnstitutunun (RATİ) 8 telekanalda, o cümlədən üç dövlət telekanalında – AzTV, İTV, Naxçıvan TV, 5 özəl televiziyada – ANS, Space, Lider, Xəzər, FND, 2 radiostansiyada – dövlət radiosu və ictimai radio, 4 internet saytında – apa.az, trend.az, day.az, musavat.com və 4 qəzetdə - “Zerkalo”, “Bizim yol”, “Azərbaycan” və “Xalq” qəzetlərində apardığı monitorinqin nəticələri buna dəlalət edir.

Araşdırmanın nəticələri oktyabrın 8-də RATİ-nin ofisində keçirilən dəyirmi masada təqdim edilib.

RATİ direktoru Emin Hüseynov qeyd edib ki, televerilişlərin monitorinq saat 18.00-dan 24.00-a qədər praym-taymda aparılıb.

Bu zaman bütün telekanallarda hazırki prezident İlham Əliyevin fəaliyyətinin işıqlandırılması üstünlük təşkil edib, digər namizədlər İTV-də pulsuz efir vaxtı istisna olmaqla, göbünməyiblər. Belə ki, AzTV-də bütün xəbərlər buraxılışlarının 38,2%-i İlham Əliyevin fəaliyyətinin müsbət və ya neytral işıqlandırılmasına həsr olunub. Bundan başqa, efirdə mərhum Heydər Əliyevin, İ.Əliyevin həyat yoldaşı Mehriban Əliyevanın və Heydər Əliyev Fondunun vitse-prezidenti qismində qızı Leyla Əliyevanın fəaliyyəti haqqında məlumatlar keçib. 

Bundan başqa, İlham Əliyevin iştirakı ilə keçirilən xüsusi tədbirlərdən xüsusi reportajlar, həmçinin başqa proqramlar ona həsr edilib. Faktiki olaraq, İlham Əliyev telekanallardan əksik olmayıb.

Bu zaman müxalifətin Milli Şurasının namizədi Cəmil Həsənlinin fəaliyyəti mənfi işıqlandırılıb.

Doğrudur, Həsənliyə qarşı qara piar özəl telekanaların efirində yer alıb. Cəmil Həsənlinin və DQMŞ-nin digər siyasətçilərinin mənfi işıqlandırılmasına xəbərlərin 6,6%-ni həsr edən Xəzər TV xüsusilə fərqlənib, Lider və Space 3,5%, ATV isə 2,3% vaxt ayırıb.

ANS-də nisbi balansa riayət olunub, amma bu kanalda da Həsənlinin fəaliyyəti neytral işıqlandırılmaqla yanaşı, İlham Əliyevə daha çox efir vaxtı ayrılıb.

Radio efirində də analoji mənzərə üstünlük təşkil edib.

Prezidentliyə digər namizədlər üç həftəlik təşviqat kampaniyası boyunca pulsuz efir vaxtı çərçivəsində 9 dəfə İTV-də 6 dəqiqəlik çıxış imkanı əldə ediblər. Bu zaman vaxtın əksər hissəsi DQMŞ namizədi Cəmil Həsənliyə qarşı istifadə olunub.

İTV Həsənliyə ödənişli efir vaxtı ayırmaqdan imtina edib. Bütün digər telekanalar ödənişli əsaslarla təşviqat materiallarının cəlb edilməsindən imtina ediblər.

Teledebatların videoyazılarının sosial şəbəkələrdə yerləşdirilməsi hesabına prezidentliyə namizədlərin TV-dəki fəaliyyətinin işıqlandırılmasındakı çatışmazlığı qismən doldurulub, internetdə 9 debata ümumilikdə 1 mln. nəfər baxıb.

İnternet saytlarda da İlham Əliyev haqqında məlumat üstünlük təşkil edib.

Cəmil Həsənli ya neqativ fonda, ya a neytral işıqlandırılıb.

Telekanallarda mövcud olan təmayül “Xalq” və “Azərbaycan” dövlət qəzetlərinə də xas olub.

Yalnız “Bizim yol” və “Zerkalo” qəzetləri, habelə musavat.com saytı siyasi plüralizmi təmin edib, lakin musavat.com-da müxalif namizədlərin fəaliyyəti daha çox işıqlandırılıb.

Layihə ATƏT-in Bakı ofisinin dəstəyi ilə həyata keçirilib. -06С-