Əməl yoxdursa, danışıq kimə lazımdır?

Milli Azadlıq Cəbhəsi Partiyasının (MACP) sədri Hürri Əliyev çərşənbə axşamı RATİ-də ölkədəki ictimai-siyasi duruma dair mətbuat konfransı keçirib. 

Natiq ölkədə milli barışıq olmamasından, prezident seçkilərindəki tele-debatlar zamanı namizədlərin danışıq tonundan “narahatlıq” keçirdiyini nəzərə çatdırıb. Amma partiya sədri narazılıqlarını konkret ifadə etməyib. Prezidentliyə namizədləri yenə də ümumi şəkildə Qarabağ probleminə diqqət ayırmamaqda tənqid edib. “Elə bil, biz torpaqları azad etmişik, bir qalır hakimiyyət uğrunda mübarizə”, deyə prezident seçkilərinin keçirilməsinə mövqe ifadə edib. 

H.Əliyev ağsaqqallıq etməyi də unutmayaraq, müxalifət və iqtidarı bir-birinə sevgilə yanaşmağa çağırıb. 

Türkiyədən bu yaxınlarda səfərdən gəldiyini deyən H.Əliyev səbəb olmadan Türkiyədə Azərbaycandakı seçkilərə maraq olmadığını bəyan edib. Onun sözlərinə görə, Türkiyəni ancaq Qarabağ məsələsi maraqlandırır. 

Daha sonra H.Əliyev Qarabağ məsələsində iqtidarla müxalifət arasında eynifikirlilik olmaması kimi bütün ölkə ictimiayyətini şoka salacaq bəyanat səsləndirib.  

Daha çox hakimiyyət uğrunda mübarizəni hədəf alan H.Əliyev “indi hakimiyyət uğrunda mübarizə vaxtı deyil” kimi əsası olmayan bəyanat verməyə qədər irəli gedib. Özlərini yeni nəsil gənclər partiyası kimi təqdim edən partiya sədri ölkəni gənclərin xilas edəcəyini vurğulayıb.

Turan-ın müxbirinin H.Əliyevə ünvanladığı həbsdə nə qədər gənclər olması, onların hansı ittihamlarla həbsə alınmaları, bu gənclərə münasibətdə hansı mövqe ortaya qoymaları haqda sualı partiya sədri cavablandıra bilməyib. Eləcə də H.Əliyev Qarabağın azadlığı barədə çox danışmağına baxmayaraq, Qarabağla bağlı danışıqların, hansı variantların müzakirə olunması haqda sualı da cavablandıra bilməyib.

Xatırladaq ki, H.Əliyev Azərbaycan milli-azadlıq hərəkatının lideri, eks-prezident Əbülfəz Elçibəyin qardaşı Almurad Əliyevin oğludur. -05C-