Azərbaycanda və Ermənistanda həyəcanla Soçi söhbətinin nəticələrini gözləyirlər

Bakı/22.07.17/Turan: Cümə günü Soçidə "Sirius" mərkəzində gənc Rusiya istedadlarının suallarını cavablandıran Vladimir Putin bildirib ki, tələsir, çünki bir saat sonra İlham Əliyevlə "ağır söhbəti" var. Onun Azərbaycan prezidenti ilə görüşü nə dərəcədə ağır olacaqdı ki, o, dözməyib bunu aidiyyatı olmayan bir auditoriya ilə paylaşıb?

Daha sonra KİV prezidentlərin baş tutmuş görüşü haqqında xəbər yaydı. "İki ölkə lideri Rusiya-Azərbaycan münasibətlərini, habelə Qafqaz regionunda vəziyyəti müzakirə ediblər. Orada vəziyyət asan deyil, deyə Vladimir Putin qeyd edib, amma məhz liderlərin belə görüşləri mürəkkəb problemlərin həllini tapmağa imkan verir, deyə "TV Centr" qeyd edib. İlham Əliyev iki ölkə arasında əməkdaşlığın uğurla inkişaf etdiyini təsdiq edib və Rusiya prezidenti ilə görüşünün bu münasibətlərin daha da möhkəmlənməsinə şərait yaradacağına ümid etdiyini bildirib.

İ.Əliyevin sözlərində, mahiyyətcə, elə bir şey yoxdur, amma Putin haqqında deyilənlərdən aydın olur ki, Soçi görüşündə diqqət mərkəzində Qarabağ problemi olub. Putin Əliyevin Rusiya-Gürcüstan münasibətləri haqqında fikrini soruşacaq deyil. Regionda ən qəliz məsələ isə Azərbaycan-Ermənistan münasibətləridir.

Ötən həftə boyunca Qarabağ cəbhəsində narahatlıq doğuran sakitlik hökm sürüb. Hətta snayperlər belə susub. Azərbaycan komandirləri həqiqətən atəşkəs haqqında əmri mühüm dövlətlərarası danışıqlar ərəfəsində verirlər, onlar başa çatdıqdan dərhal sonra isə hərbi gərginlik başlayır.

Azərbaycanlılar Soçi görüşünü həyəcanla gözləyirdilər. Müzakirələrdə hər kəs öz nöqteyi-nəzərinə əsaslanırdı. Qarabağ Azadlıq Hərəkatının sədri Akif Nağı hesab edirdi ki, Putin Əliyevi Bakıda üç il müddətinə azadlıqdan məhrum edilmiş bloger Lapşini Ermənistan həbsxanasında saxlanılan azərbaycanlılar Dilqəm Əsgərov və Şahbaz Quliyevlə dəyişdirmək üçün çağırıb. "Müəyyən əlamətlər (Bakının blogeri ekstradisiya etməyə hazır olmasını bəyan etməsi - red.) hiss olunur, başqa bir şey görünmür. Putin Soçiyə istirahətə gedəndə dövlət başçılarını söhbət üçün çağırır, özünü "ev sahibi" kimi göstərir, deyən A.Nağı Stalinlə müqayisə aparıb.

Jurnalist Vüqar Həsənov görüş təşkilatçılarının Soçidə regionun problemlərinin müzakirə olunduğu haqqında rəsmi bəyanatı ilə razıdır. "Moskva hiss edir ki, Azərbaycan onun tabeliyindən çıxır. Rusiya Qarabağda müharibə istəmir. Həmçinin, ola bilər ki, Putin MDB-dən Suriyaya sülhməramlılar göndərilməsi haqqında Moskvanın irəli sürdüyü ideyanı həyata keçirmək üçün Əliyevə oraya Azərbaycan hərbiçilərini göndərməyi təklif edib.

Ziya Hüseynli də Moskvanın Azərbaycanın Qərblə yaxınlaşması ilə bağlı narahat olduğunu güman edir.

Politoloq Elxan Şahinoğlu Azərbaycan ictimaiyyətinin Rusiya prezidentinin gözlənilmədən İ.Əliyevlə görüşmək istəyindən narahatlıq keçirdiyini qeyd edir. "Ermənistanda bu görüşdən daha çox narahat olublar. Orada soruşurlar: görəsən Putin Əliyevlə razılıq əldə edib, Ermənistana daha güclü təzyiq göstərməyəcək ki?

İstənilən halda, düşünmürəm ki, Soçi görüşü Dağlıq Qarabağ probleminin həllini sürətləndirsin. Əksinə, Kreml Azərbaycan ordusunun işğalçıya qarşı güclənən təzyiqindən narahatdır və hər yolla bu narahatlığı bizim rəhbərliyə çatdırmağa çalışır", politoloq belə hesab edir. -0-