Azərbaycanın baş prokuroru xarici həmkarlarını ölkənin diplomatik missiyalarına hücumların araşdırılmasına çağırıb

Bakı/24.07.20/Turan:  Azərbaycanın baş prokuroru Kamran Əliyev xarici ölkələrin və regionların prokurorlarına müraciət edərək ermənilərin Azərbaycanın diplomatik nümayəndəliklərinə və azərbaycanlılara qarşı  hücumlarının araşdırılmasına çağırıb.

Əsasən K. Əliyev ABŞ baş prokuroru Vilyam Barr, Kaliforniya ştatının baş prokuroru Havyer Beserra, Parisin baş prokuroru Remi Heyts və Brüsselin baş prokuroru Johan Delmulleye rəsmi müraciətlər ünvanlayıb.

Müraciətlərdə qeyd olunur ki, iyulun 21 və 22-də erməni icmasının çoxsaylı üzvləri, erməni lobbisinin radikalları,  Daşnaksütun Partiyasının üzvləri, habelə beynəlxalq aləmdə terror qrupu kimi tanınan ASALA-nın ideoloji tərəfdaşları və davamçıları Azərbaycanın diplomatik nümayəndəliklərinə, o cümlədən azərbaycanlılara qarşı müxtəlif vandalizm aktları törədiblər, nəticədə azərbaycanlı dinc nümayişçilər müxtəlif dərəcəli bədən xəsarətləri alıblar.

Baş prokuror Azərbaycanın diplomatik nümayəndəliklərinin və azərbaycanlıların təhlükəsizliyinin təmin edilməsinə çağırmaqla yanaşı   qeyd edilən ölkələrin hüquq-mühafizə orqanlarının tam və obyektiv araşdırmalar aparacağına, təqsirkar şəxslərin dairəsinin müəyyən edilərək məsuliyyətə cəlb olunacağına ümidvar olduğunu bildirib.—06D-