Bütün Rusiyanın patriarxı azərbaycanlı və erməniləri dialoqa çağırıb

Moskva/24.07.20/Turan: 2020-ci il iyulun 23-də bütün Rusiyanın patriarxı Kirill bəyanatla çıxış edərək erməniləri və azərbaycanlıları dialoqa çağırıb.

“Əsrlər boyu yan-yana yaşamış xalqların münaqişəsi 33-cü ildir ki, davam edir. 1989-cu ildən bu münaqişənin sülh yolu ilə həll olunması işində daim iştirak edirəm. Onun hər dəfə kəskinləşməsini öz şəxsi ağrım kimi qəbul edirəm.

Bu gün Rus Pravoslav Kilsəsi münaqişənin hər iki tərəfini dialoqa çağırır. Ermənistan və Azərbaycanın dini icmaları tərəfindən belə dialoq təcrübəsi toplanıb və indi buna böyük ehtiyac var.

Qafqazdakı gərginliyin artmasını istəyən qüvvələrə uymamağa çağırıram. Qafqazda yeni müharibə qaçılmaz olaraq müxtəlif terrorçuları və ekstremistləri özünə cəlb edəcək ki, bu, uzun müddətə regionu sülh və əmin-amanlıqdan məhrum edəcək.

Qarabağ münaqişəsinin üçtərəfli dialoqlarda nizamlanmasında Rus Pravoslav Kilsəsinin çoxillik sülhyaratma fəaliyyəti mənə Azərbaycan və Ermənistanın dini liderlərinə müraciət etməyə imkan verir. Əziz qardaşlar, xahiş edirəm ki,  qardaşlıq görüşləri zamanı əldə edə bildiyimiz nailiyyətləri qoruyub saxlayasınız. 

Rus Pravoslav Kilsəsi münaqişənin mümkün qədər tez başa çatması üçün çox dua edir. Ümid edirik ki, bizə qardaş olan Ermənistan və Azərbaycan xalqları düşmənçiliyə son qoymaq, etimadsızlığın dərəcəsini azaltmaq və ayrı-ayrı problemlər üzrə qarşılıqlı məqbul qərarlara nail olmaq üçün özlərində güc və müdriklik tapacaqlar”, - bəyanatda deyilir.-02D-