Azərbaycanın ərazi bütövlüyünün parçalanmasına yönələn atributların yayılmasına görə cəzalar sərtləşdirilib

Azərbaycan prezidentinin dekabrın 30-da imzaladığı və yanvarın 19-da qüvvəyə minmiş qanunla Azərbaycan Cinayət Məcəlləsinə 281-1 və 284-2-ci maddələr əlavə edilib. Sənədə görə, bu maddələrdə nəzərdə tutulan cinayətlərin ibtidai istintaqının aparılması Dövlət Təhlükəsizliyi Xidmətinə həvalə olunub.

Cinayət Məcəlləsinin 281-1-ci maddəsinə əsasən, Azərbaycanın ərazi bütövlüyünün parçalanmasına yönələn atributların və ya simvolların nümayiş etdirilməsi, yayılması, nümayiş etdirmək və ya yaymaq məqsədilə hazırlanması, əldə edilməsi, saxlanılması, daşınması və ya gəzdirilməsinə görə cinayət məsuliyyəti müəyyən edilib.

Bu əməllərə görə beş ilədək azadlıqdan məhrumetmə cəzası nəzərdə tutulur. Həmin əməllərin xarici təşkilatlar və onların nümayəndələrinin tapşırığı ilə törədilməsi isə yeddi ildən on iki ilədək müddətə azadlıqdan məhrumetmə ilə cəzalandırılacaq.

Qanuna görə, Cinayət Məcəlləsində, İnzibati Xətalar Məcəlləsində, “Azərbaycan Respublikası Silahlı Qüvvələri Daxili xidmət nizamnaməsinin təsdiq edilməsi haqqında” və “İnformasiya, informasiyalaşdırma və informasiyanın mühafizəsi haqqında” qanunlarında dəyişikliklər edilib.