Azərbaycanlı həkimlər Laçın yoluyla gedən ermənilərə yardım ediblər

Bakı/05.04.23/Turan: Aprelin 4-də axşam Rusiya sülhməramlılarının Laçın yoluyla Gorusdan Xankəndinə apardığı 27 ermənini buraxmayıblar, Ermənistan KİV bildirib.

Məlumata görə, Şuşa şəhəri yaxınlığında azərbaycanlı ekofəalların aksiyasının keçirildiyi yerdə ermənilərin olduğu avtobus dayandırılıb. Ermənilər onları buraxmadıqlarına görə qəzəbləniblər, eyni zamanda 4 qadının halı pisləşib. Sülhməramlılar onları Xankəndinə aparıb, qalanları isə Gorusa qaytarıb.

Azərbaycan teleqram kanallarının məlumatına görə, avtobus ona görə dayandırılıb ki, həmin şəxslərin səfəri əvvəlcədən razılaşdırılmayıb.

Halı pisləşən qadınlara ilkin tibbi yardımı "təcili yardım"ın azərbaycanlı həkimləri göstərib. Onlara Şuşada tibb məntəqəsinə yerləşmək təklif edilib, lakin qadınlar imtina ediblər. Ona görə də qadınları TƏBİB-in (Tibbi Ərazi Bölmələrini İdarəetmə Birliyinin) iki "təcili yardım" maşını ilə Xankəndi xəstəxanasına aparıblar.

Azərbaycanın dövlət orqanları, o cümlədən TƏBİB bu məlumatı hələlik şərh etməyib.

Lakin Şuşada aksiya iştirakçılarının sosial şəbəkələrdə yerləşdirdiyi videogörüntülər bunu təsdiqləyir. Azərbaycanın Xankəndiyə gedən "təcili yardım" maşınlarını Rusiya sülhməramlıları müşayiət ediblər.

Azərbaycanlı həkimlərdən birinin sözlərinə görə, erməni həmkarları onları sakit qarşılayıblar. Erməni xəstələrin təhvil verilməsi işgüzar mühitdə keçib. 06D