Bakı Apellyasiya Məhkəməsi  “Toplum TV” işi üzrə həbs edilənlərin şikayətlərinə baxacaq

Martın 15-də Bakı Apellyasiya Məhkəməsi  “Toplum” TV-yə qarşı cinayət işi üzrə həbs edilənlərin şikayətlərinə baxacaq.

Saat 12:00-da “Toplum” TV-nin təsisçisi Ələsgər Məmmədlinin apellyasiyasına baxılacaq; saat 12:15- Demokratik Təşəbbüslər İnstitutunun  və III Respublika Platformasının rəhbəri Akif Qurbanov; saat 12:15-  Demokratik Təşəbbüslər İnstitutunun  əməkdaşı Əli Zeynal, saat 14:15-də III Respublika Platforması İdarə Heyətinin üzvü Ruslan İzzətli.

Bu gün saat 15:00-da Demokratik Təşəbbüslər İnstitutunun  digər əməkdaşı Ramil Babayevin apellyasiya şikayətinə baxılacaq.

Sözügedən şəxslər martın 6-8-də "xarici valyuta qaçaqmalçılığı" ittihamı ilə saxlanılıblar. Onlar 4 ay müddətinə həbs ediliblər. Jurnalistlər ittihamları rədd edirlər.

Beynəlxalq təşkilatlar jurnalistlərin və fəalların “Toplum TV” işi üzrə  təqib edilməsini pisləyib. Güc qurumları “Toplum” TV-nin avadanlıqlarını götürüb, onun YouTube və İnstagram hesablarındakı videomateriallar silinib.