Bakı Norveç səfirliyinin işinin dayandırılmasına təəssüf etmir

Bakı/12.11.18/Turan: Norveçin Bakıdakı səfirliyinin fəaliyyətinin dayandırılması adi haldır və təəssüf hissi doğurmur. Bu fikir ölkənin prezident administrasiyasının xarici siyasət şöbəsinin müdiri səlahiyyətlərini icra edən Hikmət Hacızadənin şərhində ifadə olunub.

"İstənilən ölkə xaricdə səfirliyinin açılması və ya bağlanması haqqında qərarı öz maraqlarından irəli gələrək qəbul edir. Norveç səfirliyinin fəaliyyətinin dayandırılması bu ölkə hökumətinin şəxsi işidir. Bu, adi haldır və bizdə təəssüf hissi doğurmur", deyə Hacıyev bildirib.

Daha sonra Hacıyev Norveçin Azərbaycandakı səfirliyinin və bu ölkənin keçmiş səfiri Steynar Gilin fəaliyyətini tənqid edib.

Ötən illərdə Azərbaycanda Norveçin səfiri vəzifəsində işləyən Steynar Gil diplomatik protokol qaydalarına zidd fəaliyyət göstərib, Diplomatik Münasibətlər haqqında Vyana Konvensiyasını pozub, o, Azərbaycan və Norveç arasında əlaqələrə böyük zərbə vurub və Azərbaycanın daxili işlərinə qarışmağa çalışıb.

İkitərəfli məsələlərlə məşğul olmaq yerinə, o, müxtəlif mitinqlərdə iştirak edib və digər qeyri-qanuni fəaliyyətlər həyata keçirib, deyə Hacıyev qeyd edib. "Bu, Azərbaycan hökumətinin Gilin ölkədən çıxarılması məsələsinin müzakirəsinə başlamasına gətirib çıxarıb. Nəticədə Norveç hökuməti onu vaxtından əvvəl geri çağırıb", deyə Hacıyev qeyd edib.

Qeyd edək ki, rəsmi Bakı nümayəndəsinin bu şərhi hakimiyyətin kifayət qədər yumşaq olan ilk reaksiyasından xeyli sərtdir. Belə ki, Azərbaycan XİN-in mətbuat katibi Leyla Abdullayeva dünən sadəcə olaraq Norveç hökumətinin Bakıdakı səfirliyi bağlamaq qərarı ilə bağlı təəssüfünü bildirib. -02D-