Bakı Xəzərdə dəniz mühitinin qorunması üzrə çərçivə sazişi Katibliyinin paytaxtda yerləşməsini təklif edir

Xəzər dənizinin hüquqi statusu məsələsi dövlətlərin suveren hüquqları və qarşılıqlı faydalı tərəfdaşlıq ruhunda həll olunmalıdır. Bu barədə Azərbaycan xarici işlər nazirinin müavini Xələf Xələfov Bakıda keçirilən Xəzər dənizinin hüququ statusu ilə Konvensiyanın hazırlanması üzrə İşçi Qrupun xarici işlər nazirləri səviyyəsində iclasında bildirib.

O qeyd edib ki, Azərbaycan Xəzərin dibinin bölünməsi ilə bağlı öncə Bakı, Astana və Moskva arasında bağlanmış sazişə mühüm əhəmiyyət verir.

Danışıqlar prosesi çərçivəsində Xəzərin hüquqi statusuna dair Konvensiya layihəsinin müddəalarının razılaşdırılması üzrə böyük iş görülüb.

Azərbaycan Xəzəryanı dövlətlərin başçılarının dördüncü sammitində imzalanan sazişləri ratifikasiya edib.

X.Xələfov beynəlxalq əməkdaşlığın möhkəmləndirilməsi, enerji resurslarının mənimsənilməsi və beynəlxalq bazarlara nəqli üzrə investisiya mühitinin yaxşılaşdırılması, etibarlı və təhlükəsiz kommunikasiyanın yaradılması, yüksək rentabelli və ekoloji baxımdan təmiz texnologiyanın cəlb edilməsinin vacibliyini bildirib.

Bakıda Xəzərdə dəniz mühitinin qorunması üzrə çərçivə sazişi tərəflərinin altıncı konfransının keçirilməsi qərara alınıb. Görüşün əsas məqsədlərindən biri çərçivə konvensiyası Daimi Katibliyinin açılışı olacaq. Azərbaycan tərəfi Katibliyin Bakıda yerləşməsini təklif edir və  müvafiq layihəni təqdim edib.

Xəzəryanı dövlətlər (Azərbaycan, Qazaxıstan, Rusiya, Türkmənistan və İran) 2003-cü ilin noyabrında Xəzərdə dəniz mühitinin qorunması üzrə çərçivə sazişini imzalayıblar.—06D-