Əhaliyə xarici valyutada istehlak kreditlərinin verilməsi 1 ay müddətinə dayandırılıb

Maliyyə Bazarlarına Nəzarət Palatası bu gündən əhaliyə xarici valyutada istehlak kreditlərinin verilməsini 1 ay müddətinə dayandırıb.

MBNP-nin məlumatında deyilir ki, bu gün bu məsələ Direktorlar Şurasının iclasında müzakirə edilib. Qərara alınıb ki, xarici valyutada verilən istehlak kreditlərinin verilməsi sahəsində dərin və hərtərəfli təhlillərin aparılsın, istehlakçıların hüquqlarının müdafiəsinin və maliyyə sabitliyinin təmin olunması üçün zəruri tədbirlər görülsün.

Bununla əlaqədar, həmçinin, qərara alınıb ki, banklar tərəfindən əhaliyə xarici valyutada istehlak kreditlərinin verilməsi 5 aprel 2016-cı il tarixindən etibarən 1 ay müddətinə dayandırılsın və bu haqda müvafiq göstərişlər kredit təşkilatlarına göndərilsin. Palata bu müddətin uzadılması hüququnu da öz üzərində saxlayıb.

Xatırladaq ki, yanvarın 1-i üçn bankların kredit portfelinin (21 mlrd 718 mln) üçdə biri və ya 8 mlrd 383,6 mln manat istehlak kreditləridir.

AMB-nin məlumatına görə, 1 fevral üçün vaxtı keçmiş bank kreditləri 1,3 mlrd manat azalıb və 6,2% təşkil edib.

Kreditlərin 51,8%-i və ya 10 mlrd 979,5 mln manat xarici valyuta ilədir. --17D—