Bakıda keçiriləcək etiraz aksiyası ilə əlaqədar Sumqayıtda müxalifət fəalları saxlanılır

İctimai Palatanın dekabrın 10-da günorta saatlarına təyin etdiyi aksiya ilə bağlı səhər saatlarından müxalifət qüvvələri təmsilçilərinin saxlanılmasına başlanılıb. 

Müxalifət mənbələrindən daxil olan xəbərlərə görə, Müsavat Partiyası Sumqayıt şəhər təşkilatının sədri Fəxrəddin Abbas  şəhər 2 saylı polis bölməsinə aparılıb. Ondan başqa təşkilatın daha 3 üzvü saxlanılıb. 

Partiyanın Sumqayıt şəhər təşkiatının sədr müavini Vidadi Feyzinin evinə gələn polislər müsavatçının polisə gəlməsini tələb ediblər. Daha bir üzvü həbs etmək üçün polislər həmin şəxsin yaşadığı binanın önündə durublar. 

Müxalifət mənbələri bildirirlər ki, bu saxlamaların dekabrın 10-a təyin edilən mitinqlə bağlı olması heç kəsdə şübhə doğurmur. Mənbə qeyd edib ki, Bakıda təyin olunan hər hansı bir kütləvi aksiyaya reaksiyanı ilkin olaraq Sumqayıt polisi verir və şəhərdə fəaliyyət göstərən siyasi fəallar saxlanılır. -05B-