Bakıda Makronun Azərbaycanın ünvanına ittihamlarını rədd edirlər

Bakı/06.10.23/Turan:  Rəsmi Bakı oktyabrın 5-də Fransa prezidenti Emmanuel Makronun Qranadada Avropa Siyasi Birliyinin sammitindən sonra keçirdiyi mətbuat konfransında Azərbaycana qarşı səsləndirdiyi "əsassız ittihamları" qətiyyətlə pisləyir və rədd edir.

“Fransa Pprezidentinin Qranadada Azərbaycan və Türkiyənin iştirakdan imtina etməsi məsələsilə bağlı iddiaları riyakarlıq nümunəsidir”, - Azərbaycan Xarici İşlər Nazirliyinin şərhində deyilir.

Qeyd olunur ki, Türkiyənin Azərbaycan, Ermənistan, Fransa və Almaniya liderlərinin, eləcə də Avropa İttifaqı Şurası sədrinin beştərəfli görüşünə qatılmasına qarşı çıxan məhz Fransadır.

“Tarixdə özünün soyqırım siyasətilə yadda qalan, Avropa İttifaqı üzv ölkələri arasında Milli Azlıqların Müdafiəsi haqqında Çərçivə Konvensiyasına qoşulmayan yeganə ölkə olan Fransanın çoxsaylı etnik xalqların sülh və əminamanlıq şəraitində yaşadığı, multikultural və multietnik dəyərləri ilə nümunə təşkil edən Azərbaycana azlıqların hüquqları barədə dərs keçməyə cəhd etməsi qəbuledilməzdir”, - bəyanatda deyilir.

“Fransanın "ədalətli vasitəçiliyinə "gəlincə,  23 il vasitəçi kimi çıxış edib və bütün bu müddətdə "azərbaycanlıların kütləvi qətlinə, məcburi köçkünlərə və qaçqınlara qarşı zorakılığa əhəmiyyət verməyib, Ermənistan Silahlı Qüvvələrinin Azərbaycan ərazisindən çıxarılması ilə bağlı  Birləşmiş Millətlər Təşkilatı Təhlükəsizlik Şurasının tələblərini özündə əks etdirən 4 qətnaməyə məhəl qoymayıb".

30 il müddətində Azərbaycan ərazilərinin 20 faizə yaxın hissəsinin Ermənistan tərəfindən işğalına, hazırda Ermənistanın Azərbaycanın 8 kəndini hələ də işğal altında saxlamasına göz yuman Fransanın Azərbaycanı 150 kvadrat kilometr Ermənistan ərazilərinin işğalında təqsirləndirməsi gülüncdür. Azərbaycan heç bir ölkənin ərazisini işğal etməyib və delimitasiya olunmamış sərhəddə Azərbaycanın qüvvələrinin yerləşdiyi ərazilərin Ermənistana məxsus olduğunun iddia edilməsi heç bir məntiqə sığmır.

“Azərbaycana təzyiq edilməsinə çağıran Fransa tərəfinə xatırlatmaq istərdik ki, Azərbaycanla təzyiq dilində danışmaq mənasız və qəbuledilməzdir.  Belə məsuliyyətsiz bəyanatlar vermək əvəzinə, Fransanın bölgəmizdə təcavüzkar Ermənistanın dəstəklənməsi və silahlanmasına yönəlmiş, bölgədə sülh və sabitliyə mane olan məkrli siyasətinə son qoyması daha faydalı olardı ”, - nazirliyin şərhində qeyd olunur.

“Azərbaycan erməni sakinlərin Azərbaycanın Konstitusiyası və qanunvericiliyi çərçivəsində reinteqrasiyası üçün müvafiq tədbirlər həyata keçirir. Ölkəmiz hər zaman olduğu kimi, Ermənistanla qarşılıqlı şəkildə suverenlik və ərazi bütövlüyünə hörmət əsasında bölgəmizdə sülh quruculuğunda ən maraqlı tərəfdir”, - Azərbaycan Xarici İşlər Nazirliyinin şərhində deyilir.

Ötən gün Qranadada Makron "Dağlıq Qarabağda hərbi əməliyyatlar apardığına görə” Azərbaycanı “qınayıb". "Fransanın Azərbaycanla heç bir problemi yoxdur, amma Azərbaycanın ,görünür, beynəlxalq hüquqla bağlı problemləri var", - Makron deyib.

Eyni zamanda, onun sözlərinə görə, "Avropa üçün Azərbaycana qarşı sanksiyalar tətbiq etməyin vaxtı hələ gəlməyib". "Azərbaycana qarşı sanksiyalar əks-effekt verəcək və Ermənistan ərazisini və onun sakinlərini ən yaxşı şəkildə qorumağa imkan verməyəcək", - Makron qeyd edib.

Makron onu da qeyd edib ki, "Avropa Əliyevi danışıqlar masasına oturtmaq cəhdlərini davam etdirəcək". 06B