Baş nazirin müavini Şahin Mustafayevin İrana səfəri barədə

Azərbaycanın baş nazirinin müavini Şahin Mustafayev İrana səfəri çərçivəsində oktyabrın 15-də İranın xarici İşlər naziri Seyid Abbas Əraqçi ilə görüşüb.

İRNA agentliyinin məlumatına görə, görüşdə Əraqçi İranın xarici ölkələrin Qafqaza müdaxiləsinə qarşı olduğunu bəyan edərək, region ölkələrinin imkanlarından, o cümlədən 3+3 məsləhət mexanizmindən istifadənin zəruriliyini vurğulayıb.

Əraqçi  İsrailin “Fələstin və Livanın müdafiəsiz xalqına” qarşı bəzi Qərb ölkələrinin dəstəyi ilə həyata keçirilən əməliiyatlara işarə edərək, bunun dayandırılması üçün qlobal addımların atılmasının vacibliyini bildirib.

Mustafayev iki ölkə arasında ticarət, investisiya, tranzit, elektrik enerjisi, su və neft sahələrində əməkdaşlığı faydalı və konstruktiv kimi qiymətləndirib.

O qeyd edib ki, Bakı regionda sülhün bərqərar olmasına tərəfdardır. Həmçinin  qeyd edib ki, “Azərbaycan öz ölkəsinin ərazisindən qonşularına qarşı hücuma heç vaxt imkan verməyəcək”.

Səfər çərçivəsində Mustafayev İran prezidenti Məsud Pezeşkian, neft naziri Möhsin Paknejad, yol və şəhərsalma naziri Fərzanə Sadiqlə və  iqtisadiyyat naziri Əbdünnasir Himməti ilə görüşüb.

Əbdünnasir Himməti bildirib ki, Azərbaycanla İran arasında əmtəə dövriyyəsi 400 milyon dollara yaxındır ki, bu da ticarət- iqtisadi əlaqələrin genişləndirilməsi üçün əlverişli imkanlar varkən çox aşağı göstəricidir.

“Ticarətin həcminin artırılmasında pul və bank sisteminin rolu barədə müzakirələr aparıldı və Azərbaycan tərəfi bu məsələni araşdırmağa söz verdi”, - Himməti deyib.

Yol və şəhərsalma naziri Sadiql İranın Rəşt-Astara dəmir yolunun tikintisinə başlanılmasına toxunaraq deyib ki, bu məsələ Şimal-Cənub dəhlizinin inkişafı üçün dönüş nöqtəsidir. Bu marşruta aparan dəmir yolu infrastrukturunun inkişafı üçün Azərbaycan hökumətinin əməkdaşlığı çox önəmlidir.

O, iki ölkə arasında birgə uçuşların artırılmasının vacibliyini də qeyd edib.

Azərbaycan tərəfi hələlik Şahin Mustafayevin görüşləri barədə rəsmi məlumat yaymayıb.