Baş prokuror birinci yarımilin hesabatını verib

Cari ilin birinci yarısında 14 min 251 cinayət hadisəsi qeydə alınıb. Onların 85%-dən çoxu az ağır, 14,4%-i ağır və xüsusilə ağırdır. Bu barədə bugünki müşavirədə baş prokuror Zakir Qaralov bildirib.

Onun sözlərinə görə, əvvəlki illərlə müqayisədə qəsdən adam öldürmə, zorlama və xuliqanlıq əməlləri nəticəsində zərərçəkmişlərin sayı azalıb. İnsan oğurluğu və zorlama kimi cinayətlərin tamamilə açılması təmin edilib.

87 qəsdən adam öldürmə isti izlərlə açılıb.

Birinci yarımildə 1121 nəfəri ağır və xüsusilə ağır cinayətlərə görə olmaqla ümumilikdə 7003 nəfər cinayət məsuliyyətinə cəlb olunub. Məhkəmə və istintaq orqanlarından yayınan 1536 nəfər saxlanılıb.

Vəzifə saxtakarlığında və mənimsəmədə ittiham olunan 143 nəfər barəsində 100 cinayət işi məhkəməyə göndərilib.

9 mln. 785 min manat məbləğində dəyən ziyanın 3 mln. 151 min manatı ödənilib.

Müşavirədə qeyd olunub ki, 19 prokurorluq işçisi nöqsanlara görə intizam məsuliyyətinə cəlb olunub, 6 nəfər isə prokurorluq orqanlarından kənarlaşdırılıb.

Səbail Rayon prokurorluğunun müstəntiqi Vüsal Kazımov, İmişli rayon prokurorunun baş köməkçisi Çingiz Quliyev, Xaçmaz rayon prokurorunun köməkçisi Tural Allahverdi, Qubadlı rayon prokurorunun köməkçisi Adil Məmmədov kobud intizam pozuntularına görə vəzifədən azad edilib.

Masallı rayon Prokurorluğunun baş müstəntiqi Elmar Əhmədli barəsində xidmət və intizam qaydalarına riayət etmədiyinə görə cinayət işi açılıb. Bakı şəhər prokurorluğunun prokuroru Samir Nəsirov da həmin ittihamla həbs olunub. -0-