Baş prokuror İranda Heydər Əliyevin xatirəsini yad edib

Bakı/30.08.22/Turan: Azərbaycanın baş prokuroru Kamran Əliyev İranın baş prokuroru Məhəmməd Cəfər Montazerinin dəvətilə Tehrana işgüzar səfərə gedib.

Azərbaycan Baş Prokurorluğunun məlumatında  deyilir ki, Əliyevin Montazeri ilə görüşündə iki ölkənin prokurorluq orqanları arasında əməkdaşlıq məsələləri müzakirə olunub.

Əliyev İkinci Qarabağ Müharibəsi zamanı Azərbaycana mənəvi dəstəyə görə İran tərəfinə təşəkkür edib.

Görüş zamanı hüquqi sahədə əməkdaşlığa dair fikir mübadiləsi aparılıb, ikitərəfli əməkdaşlığın əhəmiyyəti vurğulanıb, hər iki ölkə vətəndaşlarının hüquqlarının müdafiəsi, sərhəd, gömrük, ekoloji və humanitar məsələlər müzakirə olunub.

Həmçinin narkotik vasitələrin qanunsuz dövriyyəsi, cinayət işləri üzrə hüquqi yardım, məhkumların ekstradisiyası və təhvil verilməsi məsələləri müzakirə olunub.

Kamran Əliyev iranlı həmkarını Bakıya dəvət edib. Qurumlar arasında əməkdaşlıq memorandumunun imzalanması təklif olunub.

Səfər çərçivəsində Kamran Əliyev İranın ədliyyə naziri Əmin Hüseyn Rəhimi ilə də görüşüb. Görüşdə məhkumların ekstradisiyası, təhvil verilməsi və digər mövzulara toxunulub.

Səfər çərçivəsində baş prokuror Azərbaycanın Tehrandakı səfirliyində olub, Heydər Əliyevin xatirəsini yad edib, məlumatda deyilir. -0-