Bayden administrasiyası və qanunvericilər bir daha Qubad İbadoğlunu azad etməyə çağırırlar

Bayden administrasiyasının Avropa və Avrasiyaya görə məsul olan yüksək vəzifəli məmuru və Konqresin Xarici işlər üzrə Komitəsinin ən az üç üzvü çərşənbə günü məşhur iqtisadçı alim Qubad İbadoğlunun həbsdən dərhal azad edilməsi çağırışlarını açıq şəkildə təkrar ediblər, xəbəri Turan-ın Vaşinqtondakı müxbiri verib.

"Biz bu məsələni daim diqqət mərkəzində saxlayırıq və onun azad edilməsində israr edirik", deyə dövlət katibinin köməkçisi Ceyms O'Brayen noyabrın 15-də Konqresin Xarici işlər üzrə Komitəsində keçirilən dinləmələrdə bildirib.

Nümayəndələr Palatasının Xarici işlər üzrə Komitəsinin üzvü konqresmen Bill Kitinq belə deyib: "Doktor İbadoğlunun hüquqlarına hörmət olunmalıdır, ədalətli məhkəmə təhqiqatını təmin etməyə və onu zəruri dərmanlarla təmin etməyə çağırıram".

Demokrat konqresmen Cim Kosta öz çıxışında konqresmenlərin Dövlət Departamentinin ünvanına Azərbaycanda "əsirlikdə olan" İbadoğlunun işini qaldırmaq çağırışı yer alan məktubunu xatırladıb. "Biz humanitar səbəblərdən onun azad olunmasını tələb etməliyik", deyə o bildirib. Konqresmen Bred Şnayder də İbadoğlunun işi üzərində dayanıb, onun oğlu Eminin zalda olduğunu bildirib.

Öz növbəsində, Ceyms O'Brayen deyib ki, ABŞ İbadoğlunun azad edilməsində israr edir. "Biz bunda israr etməyə davam edəcəyik və Azərbaycanda insan hüquqları ilə bağlı istənilən digər hadisədə də eyni şeyi edəcəyik".

Azərbaycanda demokratik prinsiplərin və sosial-iqtisadi tərəqqinin tərəfdarı olan İbadoğlu iyulun 23-də saxtakarlıq və dələduzluq ittihamı ilə Bakı yaxınlığında saxlanılıb. Bundan əvvəl polis onun tərk edilmiş mənzilində 40 000 ABŞ dolları məbləğində saxta pul tapdığını bildirib. O, bu ittihamı qəti şəkildə inkar edir. Ailə üzvlərinin sözlərinə görə, həbsdə saxlanılarkən onun səhhəti ciddi şəkildə pisləşib.