Bayden: "Jurnalistika nə burada, nə orada, nə də dünyanın hər hansı yerində cinayət deyil"

Şənbə günü ABŞ prezidenti jurnalistləri Ağ Evə illik axşam yeməyinə dəvət edib. Ardıcıl ikinci ildir ki, dəvət olunanlar arasında Turan-ın Vaşinqton müxbiri Aleks Raufoğlu da var. Hazırda Raufoğlu ABŞ Xarici Mətbuat Müxbirləri Assosiasiyası İdarə Heyətinin üzvüdür.

Bayden Donald Trampın ünvanına zarafat etmək üçün axşam yeməyindən istifadə edib. "Bəli, yaş problemdir. Mən yaşlı adamam, yarışlarda altı yaşlı uşaqla iştirak edirəm", -o  deyib əlavə edib ki, . "Tramp ilə ortaq olduğumuz yeganə şey yaşdır".

Öz növbəsində Tramp istehzaya reaksiya verməyib. Bazar günü sosial mediada yazıb ki, axşam yeməyi "həqiqətən pis" olub, Bayden isə "mütləq fəlakətdir".

Yeməyə gəlincə, Bayden axşamı birinci düzəlişə sağlıq deməklə başa vurub: "Azad mətbuatın, məlumatlı əhalinin, azadlıq və demokratiyanın qorunub saxlanıldığı Amerikanın sağlığına" deyib.

O həmçinin həbsdə olan amerikalı jurnalistlər Evan Gerşkoviç və Alsu Kurmaşevanın, eləcə də xaricdə səhvən saxlanılan digər amerikalıların "dərhal" azad edilməsinə çağırıb.

"Bəziləri sizə düşmən deyirlər. Bu, düzgün deyil və təhlükəlidir... Siz öz işinizi yerinə yetirərkən həyatınızı riskə atırsınız", -  Bayden deyib.

"Bəzi həmkarlarınız canlarını veriblər, çoxları ağır yaralanıb. Digər reportyorlar azadlıqdan məhrum edilib. Jurnalistika cinayət deyil, nə burada, nə orada, nə də dünyanın hər hansı yerində", - ABŞ prezidenti deyib.