Bayden Putinin Ukraynaya hücumunun ildönümünü qeyd etmək üçün Polşaya gedəcək

Vaşinqton/11.02.23/Turan: ABŞ prezidenti Co Bayden Rusiyanın Ukraynaya hücumunun ildönümünü qeyd etmək üçün 20-22 fevral tarixlərində Polşaya səfər edəcək, bu barədə Turan-ın Vaşinqtondakı müxbiri xəbər verir.

Səfər çərçivəsində Polşa prezidenti Duda ilə, habelə "Buxarest doqquzluğu" - NATO-nun şərq cinahındakı müttəfiqlər qrupu ilə görüşlər keçiriləcək.

Bundan başqa, Rusiyanın Ukraynaya hücumunun ildönümü ərəfəsində Bayden ABŞ-ın öz azadlığını və demokratiyanı qoruyan Ukrayna xalqını dəstəkləmək üçün dünyanı necə birləşdirdiyi və nə qədər lazımdırsa, o qədər də Ukrayna xalqının yanında olacağımız haqqında nitqlə çıxış edəcək, deyə Ağ Evin məlumatında bildirilir.

ABŞ prezidentinin Ukrayna sərhədini keçib-keçməyəcəyi hələlik məlum deyil.

Bayden cümə günü Ukrayna məsələsini ölkəyə səfər edən Braziliya prezidenti Luis da Silva ilə müzakirə edib.

Bayden və Lula "Rusiyanın Ukraynanın ərazi bütövlüyünü pozmasını və onun ərazilərinin bir hissəsinin işğal edilməsini beynəlxalq hüququn pozulması kimi pisləyiblər və ədalətli və möhkəm sülhə çağırıblar", deyə iki prezidentin birgə bəyanatında bildirilir.

Cümə günü Bayden Administrasiyası Rusiyanın Ukrayna infrastrukturuna sonuncu raket hücumlarını qətiyyətlə pisləyib.

Rusiya "növbəti dəfə təkcə transformator stansiyaları deyil, istilik stansiyaları da daxil olmaqla, infrastruktura ballistik raketlər və İran PUA-ları atıb", deyə brifinqdə Dövlət Departamentinin nümayəndəsinin müavini Vedant Patel bildirib.

"Bugünki raket hücumu su elektrik stansiyalarına da toxunub. Bu, milyonlarla evi isidən və minlərlə şəhər məhəlləsini, ofisi, xəstəxananı və məktəbi işıqlandıran elektrik stansiyalarına zərbələrdir - bu, soyuq qışda milyonlarla insanın sağ qalmasına imkan verən mühüm qurğulardır.  

Cümə günü həyata keçirilən hücumlar "Rusiyanın Ukraynanı tamamilə məhv etməyə çalışdığı haqqında daha bir xatırlatmadır", deyə Patel bildirib. 0