Bayden Ukraynada müharibəyə görə Rusiya hökumətinin və oliqarxların məsuliyyətə cəlb edilməsilə bağlı təklif irəli sürəcək

Bakı/28.04.22/Turan: Aprelin 28-də prezident Bayden Ukraynaya dəstəklə bağlı Konqresə əlavə sorğusuna uyğun olaraq, hərtərəfli qanunvericilik paketinə dair  təklifi təqdim edəcək ki, bu da prezident Putinin Ukraynaya qarşı müharibəsinə görə Rusiya hökumətinin və rusiyalı oliqarxların məsuliyyətə cəlb edilməsi üçün ABŞ hökumətinin səlahiyyətini möhkəmləndirəcək. Bu barədə Ağ Ev bildirib.

Təkliflər idarələrarası tərəfdaşlarla, o cümlədən Maliyyə Nazirliyi, Ədliyyə Nazirliyi, Dövlət Departamenti və Ticarət Nazirliyilə sıx əməkdaşlıq şəraitində hazırlanıb. Bayden Administrasiyası təkliflər paketinin reallaşdırılması üçün Konqres üzvləri ilə sıx əməkdaşlığa ümid edir.

Bu təkliflər paketi Rusiya kleptokratiyası ilə əlaqədar əmlakın müsadirəsi üzrə yeni səlahiyyətləri müəyyən edəcək, hökumətə Ukraynanın dəstəklənməsi üçün əldə edilən vəsaitdən istifadə etməyə imkan verəcək və müvafiq hüquq-mühafizə alətlərini daha da gücləndirəcək.

Bu məqsədlə Maliyyə və Ədliyyə nazirliklərinin iştirakı ilə sanksiya altında olan və həmin qanunsuz hərəkətlərə aidiyyatı olan rusiyalı oliqarxların Birləşmiş Ştatlardakı əmlakının müsadirəsi üçün yeni sadələşdirilmiş inzibati proses yaradılır. Müsadirə qərarına federal məhkəmədə sürətləndirilmiş qaydada yenidən baxıla bilər.

Yeni cinayət cəzasının tətbiqi nəzərdə tutulur ki, bu istənilən şəxs üçün Rusiya hökuməti ilə korrupsiya sövdələşmələri yoluyla şüurlu şəkildə və qəsdən əldə edilmiş gəliri qanunsuz hesab edəcək.

Kleptokratların müsadirə olunmuş əmlakından əldə olunan gəlirlərin Rusiya təcavüzündən dəyən zərərin ödənilməsi üçün Ukraynaya köçürülməsi imkanları yaradılacaq. Bu təklif Rusiyanın təcavüzü nəticəsində Ukraynaya dəyən ziyanın ödənilməsi üçün ABŞ-ın müsadirə edilmiş oliqarx vəsaitlərindən istifadə etmək imkanlarını gücləndirəcək.

Təklif sanksiyalardan yayınmaya yardımla mübarizəni əhatə edir. Mövcud qanunvericiliyə uyğun olaraq, Amerika Birləşmiş Ştatları sanksiyaların pozulmasından gələn gəlirləri müsadirə edə bilər, lakin onlar sanksiyaların pozulmasının asanlaşdırılması üçün istifadə olunan əmlakı müsadirə edə bilməz. Bu təklif bu boşluğu aradan qaldırır.

Qeyd olunur, ABŞ bütün dünyada aktivlərin izlənilməsi üçün öz müttəfiqləri və tərəfdaşları ilə işləyir. Bu günədək Avropa İttifaqına üzv dövlətlər 30 milyard dollardan çox aktivin, o cümlədən qayıqlar, vertolyotlar, daşınmaz əmlak və incəsənət əsərləri şəklində təxminən 7 milyard dolların dondurulduğunu bildiriblər.

REPO Task Force iştirakçısı olan ölkələr tərəfindən onlarla yaxtaya həbs qoyulub. ABŞ Maliyyə Nazirliyi 1 milyard dollardan çox gəmi və təyyarəyə sanksiya tətbiq edib və bloklayıb, həmçinin ABŞ bank hesablarında Rusiya elitasına məxsus yüz milyonlarla dollar dəyərində aktivləri dondurub.—0—