Baydenin Paşinyana göndərdiyi məktubun mətni Əliyevə göndərilən məktubun məzmunu ilə bənzərdir

Çərşənbə axşamı baş nazir Nikol Paşinyan Yerevanda ABŞ Milli Təhlükəsizlik Şurasının Avropa üzrə baş direktoru Maykl Karpenter və Dövlət Departamentinin xüsusi nümayəndəsi Luis Bononu qəbul edib.

Ermənistan KİV-lərinin məlumatına görə, Karpenter ABŞ prezidenti Co Baydenin Azərbaycanla sülh bağlamaq çağırışı yer alan məktubunu Paşinyana təqdim edib.

Bu məktubun mətni Karpenterin bir neçə gün əvvəl Bakıda İlham Əliyevə təqdim etdiyi məktubla bənzərdir. Bu məktubda da deyilir ki, ABŞ sülhə yol açmağa kömək edəcək cəsarətli təşəbbüslər göstərməyə hazırdır. Mən Avropa üzrə baş direktor Maykl Karpenterdən Sizə bizim atmağa hazır olduğumuz bəzi addımlar haqqında məlumat verməyi xahiş etdim. Azərbaycanla müzakirələr haqqında Sizin rəyinizi almaq istəyərdik", deyə məktubda bildirilir.

Bayden həmçinin qeyd edir ki, ABŞ "Ermənistanın birliyinə, suverenliyinə və ərazi bütövlüyünə zəmanət verən sülh sazişini" dəstəkləyir.

ABŞ prezidenti həmçinin qeyd edir ki, "sülh müqaviləsinin qalan maddələrinin yekunlaşdırılması əzmkarlıq, ixtiraçılıq və güzəşt tələb edəcək". 

Paşinyan Karpenterlə görüşdə qeyd edib ki, Ermənistan artıq razılaşdırılmış maddələr əsasında sülh müqaviləsini imzalamağa, gələcək müzakirələri davam etdirməyə hazırdır. Paşinyan müqavilənin imzalanmasının qarşılıqlı etimada şərait yaradacağından və digər məsələlərdə razılıq əldə edilməsinə müsbət təkan verəcəyinə əmin olduğunu bildirib.

Maykl Karpenter vurğulayıb ki, ABŞ Ermənistanın sülh və sabitliyin təşviqi ilə bağlı məqsədyönlülüyünü və addımlarını alqışlayır. Tərəflər regional kommunikasiyaların açılması məsələlərini də müzakirə ediblər.

Qeyd edək ki, Baydenin İlham Əliyevə məktubunda da eyni tezislər əksini tapırdı. Rəsmi Bakı və Yerevan hələlik Vaşinqtonun sülh müqaviləsinə nail olunması ilə bağlı sonuncu ideya və təkliflərinin nədən ibarət olduğunu açıqlamayıblar.