Bayramov Berseyə Azərbaycanın Avropa Şurasından gözləntilərini açıqlayıb

Sentyabrın 24-də Azərbaycan xarici işlər naziri Ceyhun Bayramov BMT Baş Assambleyasının 79-cu sessiyasının yüksək səviyyəli həftəsi çərçivəsində Avropa Şurasının baş katibi Alen Berse ilə görüşüb.

XİN-in mətbuat xidmətinin məlumatına görə, görüşdə Azərbaycan və Avropa Şurası arasında mövcud gündəlikdə duran məsələlər, habelə cari regional vəziyyət müzakirə olunub. 

Bayramov bildirib ki, Azərbaycan dialoq və qarşılıqlı hörmətə əsaslanaraq hər zaman Avropa Şurasının təsisatları ilə əməkdaşlığa açıqdır. Buna baxmayaraq, Avropa Şurası Parlament Assambleyasının cari ilin yanvar ayında Azərbaycan nümayəndə heyətinin etimadnaməsinin təsdiq etməməsinə dair qərarının əsassız və açıq şəkildə qərəzli olmaqla yanaşı dialoqa xidmət etmədiyi vurğulanıb.  

Nazir qeyd edib ki, tərəflər arasındakı bütün fikir ayrılıqları dialoq, qarşılıqlı hörmət və anlaşma vasitəsilə həll edilməlidir.

Bayramov həmçinin qarşı tərəfə postmünaqişə dövründə mövcud vəziyyət və reallıqlar barədə ətraflı məlumat verib, Azərbaycan və Ermənistan arasında sülh prosesinin gedişatından bəhs edib.