Bayramov və Hak Azərbaycanla Ermənistan arasında münasibətlərin normallaşması perspektivlərini müzakirə ediblər

Bakı/20.10.23/Turan: Cümə günü Azərbaycanın xarici işlər naziri Ceyhun Bayramov və ABŞ dövlət katibinin Avropa və Avrasiya məsələləri üzrə köməkçisinin müavini Coşua Hak ikitərəfli əməkdaşlıq məsələlərini, münaqişədən sonrakı dövrdə regiondakı vəziyyəti, Bakı ilə Yerevan arasında münasibətlərin normallaşması perspektivlərini müzakirə ediblər.

Azərbaycan Xaric İşlər Nazirliyinin mətbuat xidməti bildirib ki, Bayramov hazırda regionda vəziyyət barədə Haka məlumat verib. O qeyd edib ki,  Qarabağda antiterror əməliyyatı Azərbaycan ərazilərinin işğalına son qoymaqla yanaşı, Azərbaycan və Ermənistan arasında sülh sazişinin imzalanması və Qarabağ ermənilərinin reinteqrasiyası üçün maneələri aradan qaldırıb.

Bayramovun sözlərinə görə, Azərbaycan sülh gündəliyinin irəli aparılmasında qərarlıdır. O bu xüsusda beynəlxalq ictimaiyyətin konstruktiv mövqeyinin vacibliyini qeyd edib.

Görüş zamanı qarşılıqlı maraq doğuran ikitərəfli və çoxtərəfli məsələlər ətrafında fikir mübadiləsi aparılıb.03В06