Belarus prezidentinin Azərbaycana səfərinin yekunlarına dair

Bakı/14.04.21/Turan: Belarus və Azərbaycan iqtisadi sahədə əməkdaşlığın yeni mərhələsinə qədəm qoymaq barədə razılığa gəlib, bu barədə Belarus prezidenti Aleksandr Lukaşenko Bakıda Azərbaycan prezidenti İlham Əliyevlə apardığı danışıqların yekunlarına görə bildirib.

13-14 aprel tarixlərində baş tutan danışıqlarda iki ölkə arasında münasibətlərin strateji xarakteri təsdiq edilib, hər hansı problem və ya fikir ayrılığı olmadığı qeyd edilib.

Danışıqlarda ticari-iqtisadi əməkdaşlığa və kooperasiyanın yeni mərhələsinə keçidə böyük diqqət yetirilib. “Söhbət texnologiyaların transferindən və zəruri istehsalatların və yeni iş yerlərinin yaradılması üçün Azərbaycanda yeni birgə müəssisələrin açılmasından gedir”, deyə Lukaşenko bildirib.

Sənaye, kənd təsərrüfatı, ağac emalı, informasiya texnologiyaları, səhiyyə, turizm, təhsil sahələrində, elmi-texniki və hərbi-sənaye sahələrində əməkdaşlıq üçün böyük potensial mövcuddur.

Lukaşenko Belarusda Rusiya texnologiyası ilə istehsal edilən koronavirus əleyhinə vaksinin Azərbaycana ixrac edilməsini təklif edib.

Dövlət başçıları arasında danışıqların yekunlarına görə bir sıra ikitərəfli memorandum: Belarus Kənd Təsərrüfatı Nazirliyi və Azərbaycan Qida Təhlükəsizliyi Agentliyi arasında; hər iki ölkənin Energetika nazirlikləri arasında; Belarusun Milli Turizm Agentliyi və Azərbaycan Dövlət Turizm Agentliyi arasında; “Belneftxim” konserni və SOCAR şirkəti arasında memorandumlar imzalanıb.

Danışıqlar Əliyevin Bakıdan 40 km məsafədə, Xəzərin sahilində Zaqulba qəsəbəsində yerləşən iqamətgahında aparılıb. Dünən Lukaşenko və Əliyev bir neçə saat davam edən təkbətək qeyri-formal görüş keçiriblər. -02D-