Bəxtiyar Hacıyev məhkəməni prosesi süni şəkildə uzatmaqda ittiham edib

Sentyabrın 13-də Bakı Ağır Cinayətlər Məhkəməsində ictimai fəal Bəxtiyar Hacıyevin işi üzrə proses davam edib.

İclasda prosesə gəlməyən qalan beş şahidin istintaqa verdiyi ifadələr oxunub.

Fəal yenidən hakimləri prosesi süni şəkildə uzatmaqda və Avropa İnsan Hüquqları Konvensiyasının 5-ci maddəsini pozmaqda ittiham edib.

Daha sonra məhkəmə sənədləri tədqiq etməyə başlayıb. Yasamal Rayon Məhkəməsinin zalında Hacıyev və zərərçəkmiş kimi tanınan Ülviyyə Muradova (Alovlu) arasında insidentin videogörüntülərinə baxılıb. Hacıyevin həbsinin ilk səbəbi məhz bu hadisə olmuşdu.

Videoya baxış sentyabrın 20-də keçiriləcək növbəti iclasda davam etdiriləcək.

* Bəxtiyar Hacıyev 9 dekabr 2022-ci il tarixində jurnalist Ülviyyə Alovlunun şikayətilə saxlanılıb. Əvvəlcə Cinayət Məcəlləsinin 221 (xuliqanlıq) və 289-cu (məhkəməyə hörmətsizlik) maddələrilə ittiham olunub. 2023-cü ilin iyulunda ona qarşı Cinayət Məcəlləsinin 192 (qanunsuz sahibkarlıq), 193-1 (cinayət yolu ilə əldə edilmiş gəlirlərin leqallaşdırılması) və 206-cı ( qaçaqmalçılıq) maddələri ilə ittiham irəli sürülüb.

7 noyabr 2023-cü il tarixində Cinayət Məcəlləsinin 213.1-ci (vergidən yayınma, işsizlik, icbari tibbi və sosial sığorta üzrə sığorta ödənişlərindən yayınma) maddəsilə ittiham irəli sürülüb.

Bəxtiyar Hacıyev bütün ittihamları rədd edir,  hakimiyyəti tənqid etdiyinə görə təqib olunduğunu bildirir və repressiyalarda əli olan Azərbaycan məmurlarına qarşı beynəlxalq sanksiyalar tətbiq etməyə çağırır. Hüquq müdafiəçiləri onu siyasi məhbus kimi tanıyıblar.