Bəxtiyar Hacıyevin vəkili onun müdafiə hüququnun pozulduğunu bildirir

Dekabrın 23-də Ağır Cinayətlər Məhkəməsində fəal Bəxtiyar Hacıyevin işi üzrə prosesdə mühafizəçilər onun vəkillə ünsiyyətinin məxfiliyini pozublar. Bu barədə onun vəkili Aqil Layıc bildirib.

Belə ki, Bəxtiyar Hacıyev planlaşdırılan vəsatətlərlə bağlı sənədləri vəkilə vermək istəyib. Lakin mühafizəçilər buna imkan verməyiblər. Onlar sənədləri fəalın əlindən alıblar.

"Bu, təqsirləndirilən şəxsin vəkillə ünsiyyətinin məxfiliyinin və müdafiə hüququnun birbaşa pozuntusudur", deyə Layıc bildirib. Vəkilin etirazına baxmayaraq, prosesə sədrlik edən hakim Əli Məmmədov insidentə diqqət yetirməyib. Vəkilin sözlərinə görə, mühafizəçilər sənədləri nə ona, nə də Hacıyevə qaytarıblar.

O, həmçinin qeyd edib ki, mühafizəçilərin qanunsuz hərəkətləri ilə əlaqədar Penitensiar Xidmətin rəhbərliyinə müraciət edib.

Penitensiar Xidmətdən şərh almaq mümkün olmayıb.

* İctimai fəal Bəxtiyar Hacıyev 2022-ci ilin dekabrında xuliqanlıq və məhkəməyə qarşı hörmətsizlik ittihamları ilə həbs olunub.

Ötən il iyunun 16-da fəala qarşı yeni ittihamlar irəli sürülüb. Bu ittihamlar əsasən maliyyə məsələlərilə - ayrılan qrantların təyinatı üzrə xərclənməməsilə bağlıdır. Ona həmçinin Cinayət Məcəlləsinin 192-ci (qanunsuz sahibkarlıq), 193-1-ci (cinayət yoluyla əldə edilmiş əmlakı leqallaşdırma), 206-cı (qaçaqmalçılıq), 320-ci (saxta sənədlərdən istifadə) maddələrilə ittiham verilib.

Həmin ilin noyabrda isə ona daha bir ittiham verilib. Hacıyevə qarşı Cinayət Məcəlləsinin 213.1-ci (vergidən yayınma) maddəsilə daha bir ittiham irəli sürülüb.

Hacıyev özü və həmkarları prosesi Azərbaycan DİN-i və şəxsən nazir Vilayət Eyvazovu kəskin tənqid etdiyinə görə siyasi sifariş hesab edir.